ABŞ Xarici Əlaqələr Şurasının keçmiş rəhbəri Riçard Haas bildirib ki, Ukrayna ilə Rusiya arasında atəşkəs razılaşması olmadan sülh sazişi imzalamaq ciddi taktiki səhv olar. Onun sözlərinə görə, bu cür yanaşma müharibənin uzanmasına və danışıqların uğursuzluqla nəticələnməsinə səbəb ola bilər.
Vətəninfo.az xəbər verir ki, Haas “Politico” nəşrinə verdiyi açıqlamada ABŞ prezidenti Donald Trampın tərəfləri birbaşa sülh sazişinə yönəltmək çağırışını tənqid edib. Tramp əvvəllər bəyan etmişdi ki, Kiyev və Moskva arasında atəşkəsdən əvvəl sülh razılaşması əldə olunmalıdır.
“Əsas prioritet bütün mübahisəli məsələlərin bir anda həlli deyil, ilk növbədə döyüşlərin dayandırılmasıdır”, – deyə Haas qeyd edib.
Diplomat vurğulayıb ki, sadə atəşkəs razılaşması nisbətən tez əldə edilə bilər, lakin hərtərəfli sülh sazişi aylar və bəlkə də illərlə davam edəcək mürəkkəb danışıqlar tələb edir.
“Birbaşa yekun statusa keçmək və atəşkəsi istisna etmək müharibəni uzadacaq, hətta sülhə nail olmağı mümkünsüz etməsə də, xeyli çətinləşdirəcək”, – deyə Haas əlavə edib.
Onun fikrincə, yalnız bütün ilkin şərtlər mövcud olduqda birbaşa sülh danışıqları aparmaq məntiqlidir, lakin bu mərhələdə həmin şərtlər yoxdur. “Rusiya ilə Ukrayna, Putinlə Zelenski arasında uçurum çox böyükdür”, – diplomat bildirib.
Daha əvvəl Kipr, Yaxın Şərq və Şimali İrlandiyadakı münaqişələrin həlli prosesində iştirak etmiş Haas hesab edir ki, əgər Tramp administrasiyası sülhə nail olmaq istəyirsə, əvvəlcə Rusiya üzərində təzyiqləri əhəmiyyətli dərəcədə artırmalıdır.
