ABŞ Hərbi Qüvvələri, Sakit Okeanın şərqində narkotik daşımaqda şübhəli bilinən dörd gəmiyə raket zərbəsi endirib. Zərbələr nəticəsində 14 nəfərin öldüyü bildirilib.
Vətəninfo.az NBC News-a istinadən xəbər verir ki, ABŞ Müdafiə Naziri Pete Hegseth zərbələr zamanı 14 “narkoterrorçu”nun öldüyünü açıqlayıb, bir nəfərin isə sağ qalaraq Meksika səlahiyyətliləri tərəfindən xilas edildiyini qeyd edib. Hegseth bildirib ki, gəmilər “Sakit Okeanın şərqində narkotik qaçaqmalçılığı ilə məşğul olan terror təşkilatları tərəfindən idarə olunurdu”.
Müdafiə naziri, Prezident Donald Tramp-ın göstərişi ilə həyata keçirilən bu əməliyyatın məqsədinin narkotik ticarətini pozmaq olduğunu vurğulayıb. Pete Hegseth X sosial şəbəkəsində yazıb ki, kəşfiyyat orqanları bu gəmilərin narkotik ticarətinin tanınmış marşrutları üzrə hərəkət etdiyini və narkotik maddələr daşıdığını əvvəlcədən bilirdi.
Zərbələr zamanı birinci gəmidə səkkiz narkotik terrorçusu, ikinci gəmidə dörd nəfər, üçüncü gəmidə isə üç nəfər öldürülüb. Zərbələrdən biri eyni anda iki gəmini vurub.
Meksika Prezidenti Klaudiya Şeynbaum əməliyyatı pisləyib və bildirib ki, ABŞ səfiri vəziyyəti nəzərdən keçirmək üçün çağırılıb.
Müdafiə Nazirliyinin rəsmi məlumatına görə, ABŞ qüvvələri bu günə qədər 13 zərbə həyata keçirib, nəticədə 57 nəfər həyatını itirib. Səkkiz zərbə Karib dənizində, beşi isə Şərqi Sakit Okeanda həyata keçirilib.
Bundan əvvəl, ABŞ-ın Latın Amerikasında quru əməliyyatlarına başlamaq planları barədə məlumat verilmişdi.
