Dünyanın ən böyük kriptovalyuta platformalarından biri olan Binance kiberhücuma məruz qalıb. İlkin məlumatlara görə, platformanın isti pul kisələrindən təxminən 6,3 milyard dollar dəyərində kriptovalyuta aktivləri oğurlanıb.
Reuters agentliyinin məlumatına görə, hücumun Şimali Koreyanın Lazarus adlı haker qrupu tərəfindən həyata keçirildiyi ehtimal olunur. Kriptovalyuta əməliyyatlarını izləyən mütəxəssislər də hücumun bu qrupla əlaqəli ola biləcəyini bildirirlər.
İlkin araşdırmalara əsasən, hakerlər Binance şirkətinin DevOps mühəndisinin kiberhücuma məruz qalmış noutbukundan istifadə edərək platformanın daxili sistemlərinə daxil olublar. Bu yolla hücum edənlər xidmətin konteyner mühitinə giriş əldə edərək icazəsiz maliyyə əməliyyatları həyata keçirə biliblər.
Şirkət şəxsi pul kisələrinin açarlarının ələ keçirilməsinə dair hər hansı sübutun olmadığını açıqlayıb. Binance oğurlanmış vəsaitlərin izlənilməsi və dondurulması məqsədilə blokçeyn tərəfdaşları ilə əməkdaşlığa başlayıb. Məlumata görə, təxminən 3 milyard dollar dəyərində aktivin bloklanmasına nail olunub.
Hadisə ilə əlaqədar təhlükəsizlik tədbirləri çərçivəsində depozit və pul çıxarılması əməliyyatları müvəqqəti dayandırılıb. Həmçinin hücumla əlaqəli ünvanın icazələri ləğv edilib, vəsaitlərin izlənilməsi və mümkün bərpası üçün hüquq-mühafizə orqanları ilə əlaqələr qurulub.
Binance şirkəti istifadəçilərin itkilərinin SAFU sığorta fondu və şirkətin öz vəsaitləri hesabına qarşılanacağını bəyan edib.
Qeyd edək ki, hadisə kriptovalyuta sektorunda kibertəhlükəsizlik məsələlərini yenidən gündəmə gətirib.
