Britaniya Ordusu Solsberi poliqonunda keçirilən təlim zamanı Ajax tipli zirehli döyüş maşınlarında yaranan güclü daxili səs-küy və vibrasiya səbəbilə təxminən 30 əsgərin səhhətində problemlər yarandığını açıqlayıb. Hadisədən sonra texnikanın istifadəsi ehtiyat tədbiri olaraq iki həftəlik dayandırılıb.
Vətəninfo.az xəbər verir ki, Müdafiə Nazirliyinin məlumatına görə, əsgərlər təlim zamanı qusma, başgicəllənmə və nəzarətsiz titrəyiş kimi simptomlar yaşayıb. Nazirlik bildirib ki, təlim dərhal dayandırılıb və bütün şəxsi heyət tibbi müayinədən keçirilib.
“30-a yaxın hərbi qulluqçu uyğun simptomlarla həkimə müraciət edib. Onların əksəriyyəti artıq xidməti fəaliyyətə qayıdıb, az sayda əsgərin isə müalicəsi davam edir,” – məlumatda qeyd olunur.
Müdafiə naziri Lyuk Pollardın göstərişi ilə Ajax maşınlarından təlim məqsədilə istifadə iki həftə müddətinə dayandırılıb. Bununla yanaşı, mümkün nasazlıqları müəyyənləşdirmək üçün məhdud texniki sınaqlar davam etdiriləcək.
6,3 milyard funt sterlinqlik Ajax proqramı artıq bir neçə ildir ki, səs-küy və vibrasiya ilə bağlı problemlər səbəbindən gecikmələrlə üzləşir. Bu nasazlıqlar əsgərlərdə eşitmə və digər sağlamlıq fəsadları yaratdığı üçün layihənin icrası dəfələrlə təxirə salınıb.
Ajax zirehli maşınlarının 2017-ci ildə istifadəyə verilməsi planlaşdırılsa da, ilkin əməliyyat hazırlığı yalnız bu ay təsdiqlənib. Nəzərdə tutulan 589 maşından bu günə qədər 160-dan çoxu istehsal olunub.
Proqramın tam əməliyyat qabiliyyətinə çatmasının isə ən azı 4 il vaxt aparacağı proqnozlaşdırılır. Ajax, hazırda istifadə olunan və 1971-ci ildən xidmətdə olan CVR(T) tipli zirehli texnikaları əvəz etməlidir.
Noyabrın 5-də müdafiə naziri Pollard çıxışında bildirmişdi: “Ajax ciddi çətinliklərdən keçdi və özünü doğrultdu. O, dünyanın ən inkişaf etmiş orta sinif zirehli döyüş maşınıdır.”
