Çin Koreya yarımadasının qərbində – Sarı dənizdə dəniz donanması ilə təlimlərə başladığını bildirib.
Vətəninfo.az xəbər verir ki, Çin Müdafiə Nazirliyindən verilən məlumata görə, Çin Xalq Azadlıq Ordusunun Şimal Cəbhəsi Komandanlığının dəniz donanması bir neçə gün ərzində Sarı dənizdə durmadan dəniz təlimləri keçirəcək.
Sarı dəniz təlimində hava hücumundan müdafiə və sualtı qayıq əleyhinə raketlər daşıyan, idarə olunan raket esminesi və üç freqat iştirak edir.
Raket və gəmi əsaslı atəş hücumları, hava və dəniz müdafiəsi, kəşfiyyat və əks-kəşfiyyat məşqlərinin keçiriləcəyi təlimin məqsədi gəmilər arasında əməkdaşlıq imkanlarının artırılmasıdır.
Qeyd edək ki, bu təlim dekabrın 14-də Koreya yarımadasının şərqində – Yapon dənizində (Şərq dənizi) Çin və Rusiya təyyarələrinin birgə patrul uçuşlarından sonra baş tutub.
Cənubi Koreya 2 Çin və 4 Rusiya təyyarəsinin həmin gün Koreya Hava Hücumundan Müdafiə və Tanıma Zonasına daxil olduğunu bildirib.
Yaponiya da 2 Çin və 2 Rusiya bombardman təyyarəsinin Şərq dənizi üzərində uçduğunu aşkarlayıb.
Hər iki ölkə ehtiyat və xəbərdarlıq məqsədi ilə bölgəyə döyüş təyyarələri göndərdiklərini açıqlayıb.
