Danimarkanın Baş naziri Mette Frederiksen, ABŞ-ın Qrenlandiyaya olan iddialarının NATO-nun dağılmasına səbəb ola biləcəyini bildirib. Bu barədə Vətəninfo.az Associated Press xəbər mənbəyinə istinadən məlumat yayıb.
Frederiksen yanvarın 6-da verdiyi açıqlamada, ABŞ-ın digər NATO üzvü ölkəsinə qarşı hərbi güc tətbiq etməsi halında bunun alyansın sona çatmasına gətirib çıxaracağına dair xəbərdarlıq edib: “Əgər ABŞ başqa bir NATO üzvü ölkəsinə qarşı hərbi güc tətbiq etmək qərarına gələrsə, bu, bitəcək”.
Qrenlandiyanın Baş naziri Jens Frederik Nilsen də ABŞ-ın Qrenlandiya ilə bağlı hərbi əməliyyatlarının fəlakətli nəticələrə səbəb ola biləcəyinə diqqət çəkib.
Bu açıqlamalar ABŞ-ın Venesueladakı hərbi əməliyyatlarının gərginləşdiyi bir vaxtda verilib. ABŞ prezidenti Donald Tramp daha əvvəl bildirmişdi ki, ABŞ-ın müdafiə məqsədləri üçün Danimarkanın muxtar ərazisi olan Qrenlandiya adasına ehtiyacı var.
Danimarka və Qrenlandiya rəsmiləri, ABŞ-ın bu növ iddialarının regional təhlükəsizliyi və beynəlxalq münasibətləri zədələyə biləcəyini vurğulayıblar.
