Fransada iki yeniyetmə sinaqoqlara və Eyfel qülləsinə qarşı terror hücumu planlaşdırmaqda ittiham olunub. Vətəninfo.az xəbər verir ki, bu barədə Le Figaro məlumat yayıb.
Nəşrin məlumatına görə, hər iki yeniyetmə ərəb-müsəlman mənşəli ailələrdən gəlir və İŞİD (İslam Dövləti) terror qruplaşmasına qarşı xüsusi maraq göstəriblər.
15 və 17 yaşlı şübhəlilər həmçinin xaricə gedərək döyüşmək ideyasını da müzakirə ediblər və onlayn şəkildə ifrat dərəcədə zorakı məzmunlara baxıblar.
Le Figaro yazır ki, sözügedən şəxslər iyulun 29 və 30-da həbs olunublar. İstintaq isə aprel ayında başlanılıb. Onlara qarşı rəsmi ittiham avqustun 1-də irəli sürülüb.
Qeyd olunur ki, Fransada yəhudi icmasının nümayəndələri antisemit hərəkətlərin sayının artdığını bildiriblər. Bu artım, 7 oktyabr 2023-cü il tarixində HƏMAS tərəfindən İsrailə qarşı həyata keçirilən və 1,200 nəfərin ölümünə, 251 nəfərin isə girov götürülməsinə səbəb olan hücumdan sonra qeydə alınıb. Həmin hadisə Qəzza müharibəsinin başlanmasına səbəb olmuşdu.
Hazırda Fransa dünyada yəhudilərin ən böyük icmalarından birinə ev sahibliyi edir.
