İrakli Kobaxidze Azərbaycanla enerji sahəsində imzalanan mühüm müqavilənin Gürcüstan üçün strateji əhəmiyyət daşıdığını bildirib.
Vətəninfo.az xəbər verir ki, Gürcüstanın Baş naziri İrakli Kobaxidze Azərbaycanla enerji sahəsində əməkdaşlığın ölkəsi üçün əhəmiyyətindən danışıb.
Kobaxidze hökumətin iclasında bildirib ki, Azərbaycanla imzalanan mühüm müqavilə Gürcüstana 20 il müddətinə qazın həm həcmi, həm də qiyməti baxımından əlverişli şərtlərlə təminat almağa imkan verəcək.
“Qonşularımızla iqtisadi əlaqələrimizi gücləndirmək çox vacibdir. Bu baxımdan, əsasən ölkənin qaz təchizatı ilə bağlı olan Azərbaycanla imzalanmış mühüm müqaviləni vurğulamaq istərdim. Gürcüstanın 20 illik perspektivdə həm qaz həcmi, həm də aşağı qiymət baxımından zəmanət alması çox vacibdir. Bu, ölkəmiz üçün strateji əhəmiyyət kəsb edirdi və mən azərbaycanlı tərəfdaşlarımıza dost münasibətlərinə görə təşəkkür etmək istərdim”, – deyə baş nazir qeyd edib.
Kobaxidze həmçinin elektrik enerjisinin Azərbaycandan birbaşa, vasitəçisiz idxal olunacağını bildirib. Onun sözlərinə görə, bu mexanizmin tətbiqi Gürcüstan dövlətinə əlavə xərcləri azaltmağa və hər il bir neçə milyon gəlir əldə etməyə imkan verəcək.
Qeyd edək ki, əvvəlki illərdə Azərbaycanla Gürcüstan arasında enerji mübadiləsi çərçivəsində müxtəlif svop və ticarət mexanizmlərindən istifadə olunub. 2023-cü ildən etibarən isə Gürcüstanın elektrik enerjisi bazarında liberallaşma və ESCO saatlıq bazar modelinə keçid nəticəsində əvvəlki sxemlər dəyişib. Hazırda özəl treyderlər elektrik enerjisinin alqı-satqısında bazar iştirakçıları kimi çıxış edə bilərlər.
