Dünən baş verən dəhşətli qəza bütün dünyanı sarsıtdı. İran Prezidenti İbrahim Rəisinin helikopterində olan bütün sərnişinlər, o cümlədən dövlət başçısı həlak olub. Bu barədə ilk açıqlamanı İran Qızıl Aypara Cəmiyyətinin rəhbəri Pir Hüseyn Kolivənd bildirdi.
Kolivənd aydınlaşdırıb ki, qəza yerinə çatan xilasedicilər heç bir canlı insan izi aşkar etməyiblər.
Rəisidən başqa helikopterdə İranın xarici işlər naziri Hüseyn Əmir Abdullahian, Şərqi Azərbaycan vilayətinin qubernatoru Mələk Rəhməti və Təbriz şəhərinin cümə imamı Məhəmməd Əli Ale Haşim də olub.
Bundan əvvəl Tehrandakı anonim mənbə Rəisinin fəlakətdən sağ çıxmaq şansının çox az olduğunu iddia etmişdi.
İran rəsmi şəkildə radarlardan itən helikopterin eniş zamanı tamamilə yandığını açıqlayıb. Hadisə yerinə gələn xilasedicilər iddia ediblər ki, təyyarənin yerləşdiyi şəraiti “yaxşı adlandırmaq olmaz”.
Həmçinin mediada fövqəladə hadisə yerindən kadrlar yer alıb. Fotoda helikopterin dağıntıları dağın yamacındakı ağacların arasında əks olunub.
Axtarış işləri pis hava şəraiti və çətin relyefə görə çətinləşib. Türkiyənin “Akıncı” pilotsuz uçan aparatının köməyi ilə qəza yerini tapmaq mümkün olub.
Bir sıra ölkələr də xilasetmə əməliyyatına kömək etməyə hazır olduqlarını bəyan ediblər.
İlkin məlumata görə, helikopter qatı duman və elektron nasazlıq səbəbindən idarəetməni itirib, dağın yamacına düşüb və alovlanıb. Pilot səhvi və təxribat versiyaları da var idi.
Qeyd edək ki, Rəisinin helikopteri mayın 19-da günorta saatlarında İran lideri ilə Azərbaycan Prezidenti İlham Əliyev arasında görüşdən sonra Şərqi Azərbaycan əyalətinə sərt eniş edərək yerə düşüb. Mayın 20-nə keçən gecə İranın icra işləri üzrə vitse-prezidenti Möhsün Mənsuri qəzaya uğrayan helikopterdəki insanlarla bir neçə dəfə əlaqə saxlamağın mümkün olmadığını bildirib. Sonradan məlum olub ki, helikopterdə olan Təbriz məscidinin cümə imamı Seyid Məhəmməd-Əli əl-Haşemlə əlaqə saxlamaq mümkün olub. O, özünü yaxşı hiss etmədiyini bildirib və avtomobillərin və təcili yardım maşınlarının səslərini eşitdiyini söyləyib.
Həmçinin gecə saatlarında qəzanın dəqiq yerinin müəyyən edildiyi barədə dəfələrlə məlumat verilib. Lakin hər dəfə bu məlumatın yalan olduğu üzə çıxıb.
İndi isə İranın Telegram kanalları helikopterin “Qara qutu”sunun tapıldığını iddia edir. İran Telegram kanalları iddia edir ki, tapılan qutu oxunduqdan sonra bu cinayətin kim tərəfindən törədildiyi bəlli ola bilər. Çünki bunun adi bir qəza olmadığını iddia edən mənbələr var. İddiaya görə İranın hakimiyyətdaxili çəkişmələri nəticəsində helikopter vurula bilər. Sözsüz bütün qaranlıq məsələlər “Qara qutu” oxunduqdan sonra bəlli olacaq.
Qoşqar Salmanlı
