Hindistanın Müdafiə Nazirliyi ABŞ hökumətinə 31 ədəd MQ-9B Reaper (həmçinin Predator-B kimi də tanınır) hücum dronları almaq üçün rəsmi müraciət edib. Müqavilə 2024-cü ilə qədər bağlana bilər. Vətəninfo.az xəbər verir ki , bu barədə “The Times of India” məlumat yayıb.
Nəşrin yüksək səviyyəli mənbələri yazılı sorğunun bir neçə gün əvvəl, baş nazir Narendra Modi ilə ABŞ prezidenti Co Baydenin görüşü ərəfəsində göndərildiyini bildiriblər. Bayden G20 sammiti üçün sentyabrın 8-də Yeni Dehliyə gələcək.
Üstəlik, prezident Co Bayden administrasiyasının cavabı “bir-iki ay ərzində” gözlənilir.
ABŞ Hindistanın tələbinə rəsmi cavab verdikdən sonra tərəflər müqavilənin dəyəri barədə razılığa gələcəklər. İlkin olaraq təxminən 3,1 milyard dollar dəyərində qiymətləndirilirdi.
Pilotsuz təyyarənin alınması ilə bağlı ilkin razılaşma Modinin iyun ayında Vaşinqtona səfəri zamanı əldə olunub.
Hindistanın silahlı qüvvələrin hər üç qolu üçün pilotsuz təyyarələr alacağı gözlənilir, çünki pilotsuz təyyarələr dəniz kəşfiyyatı, sualtı qayıqlarla mübarizə və quru hədəflərinə hücum da daxil olmaqla müxtəlif əməliyyatları yerinə yetirə bilir. Hindistan Hərbi Dəniz Qüvvələri artıq 2020-ci ildə iki Predator kəşfiyyat aparatını icarəyə götürərək Amerika pilotsuz təyyarələrinin bu modelini sınaqdan keçirib.
