Araz Azad İqtisadi Zonasının İqtisadiyyat və İnvestisiya üzrə direktor müavini Əli Nəvid İranın azad iqtisadi zonalarının beynəlmiləlləşdirilməsinə həsr olunan iclasda deyib: “Araz Azad Ticarət Zonasında istehsal olunan məhsullar Qafan şəhərinə ixrac edilib”.
Vətəninfo.az xəbər verir ki, bu barədə Shahre Bours nəşri yazıb. O, əlavə edib: “İran-Türkiyə Birgə Ticarət Palatası ilə əlaqə və müştərək işgüzar nümayəndə heyətlərinin mübadiləsinə dair razılaşma, İran-Azərbaycanın Birgə Ticarət Palatası ilə görüş və İran-Ermənistan Birgə Ticarət Palatası ilə sıx ünsiyyətin qurulması Araz Azad Ticarət Zonasının beynəlmiləlləşdirilməsi istiqamətində atılan digər addımlardan olub”.
“Mehri və Norduz birgə azad iqtisadi zonasının yaradılmasına dair daha əvvəl saziş bağlansa da, indiyədək heç bir operativ addım atılmayıb, ona görə də biz bu məsələni səylə davam etdiririk ki, Ermənistanla birgə azad iqtisadi zona yarada bilək və həmin zona ilə yanaşı, Ermənistana uyğun azad ticarət zonasının da yaradılmasına çalışırıq”,-deyə o, əlavə edib.
Ermənistanın Qafan şəhərində Araz Azad İqtisadi Zonasının məhsulları sərgisini açdıqlarını qeyd edən Nəvid habelə deyib: “İranın Azad İqtisadi Zonalarının beynəlmiləlləşdirilməsi istiqamətində, bu yaxınlarda Araz Ticarət Zonası Ermənistanda çoxsaylı konfrans və sərgilərin təşkilində fəal iştirak edib və bu, Araz Azad İqtisadi Zonasının məhsullarının ilk partiyasının bu ölkəyə ixracı ilə nəticələnib”.
