Vətəninfo.az xəbər verir ki, CNN-in kəşfiyyat məlumatları ilə tanış olan bir neçə ABŞ rəsmisinə istinadən verdiyi məlumata görə, ABŞ yeni kəşfiyyat məlumatı əldə edib ki, bu da İsrailin İranın nüvə obyektlərinə zərbələr endirməyə hazırlaşdığını göstərir, hətta prezident Donald Tramp administrasiyası nüvə proqramı ilə bağlı Tehranla razılığa gəlməyə çalışır.
“İsrailin İranın nüvə obyektinə zərbə endirməsi ehtimalı son aylarda xeyli artıb”, – telekanalın həmsöhbətlərindən biri deyib.
Onun sözlərinə görə, “Trampın danışıqlar apardığı və bütün İran uranının ləğvinə gətirib çıxarmayacaq ABŞ-İran razılaşması perspektivi zərbə ehtimalını artırır”.
Bir çox mənbə, mümkün zərbə ilə bağlı narahatlıqların təkcə yüksək səviyyəli İsrail rəsmilərinin açıq və şəxsi mesajları ilə deyil, həm də İsrailin ələ keçirilən kommunikasiyaları və qaçılmaz bir zərbəyə səbəb ola biləcək İsrail hərbi hərəkətləri ilə bağlı müşahidələri ilə qaynaqlandığını qeyd etdi.
Eyni zamanda rəsmilər bildiriblər ki, İsrail liderlərinin mümkün zərbə ilə bağlı yekun qərar verib-verməməsi hələ də bəlli deyil. Bu həm də İsrailin Vaşinqtonun Tehranla danışıqları haqqında nə düşünməsindən asılıdır.
Yüksək rütbəli bir amerikalı məmur həmçinin CNN-ə bildirib ki, Birləşmiş Ştatlar İsrail liderləri zərbə endirmək qərarına gələrsə, yardım göstərməyə hazır olmaq üçün kəşfiyyat məlumatlarını toplayır.
Öz növbəsində telekanalın digər həmsöhbəti qeyd edib ki, Tehran böyük təxribata əl atmasa, ABŞ çətin ki, İsrailə İranın nüvə obyektlərinə zərbə endirməkdə kömək etsin.
Eyni zamanda mənbələr İsrailin Amerikanın köməyi olmadan İranın nüvə proqramını məhv edə bilməyəcəyini qeyd ediblər.
İsrailli bir mənbə CNN-ə bildirib ki, əgər ABŞ İranla İsrailin qəbul etməyəcəyi “pis razılaşma” edərsə, İsrail təkbaşına hərbi əməliyyata hazır olacaq.
Mayın 11-də Omanda ABŞ və İran arasında dolayı danışıqların dördüncü raundu keçirilib. Tərəflər danışıqları davam etdirmək barədə razılığa gəliblər.
