Rusiyanın xarici işlər naziri Sergey Lavrov fevralın 25-də işgüzar səfərlə İrana gedəcək və orada iranlı həmkarı Abbas Əraqçi ilə görüşəcək. Vətəninfo.az xəbər verir ki, bu barədə çərşənbə axşamı Rusiya Xarici İşlər Nazirliyi məlumat yayıb .
“Fevralın 25-də Rusiyanın xarici işlər naziri Sergey Lavrov İranın xarici işlər naziri Abbas Əraqçinin dəvəti ilə Tehrana işgüzar səfər edəcək. Xarici işlər nazirliklərinin rəhbərləri yanvarın 1-də yeni dövlətlərarası sazişin imzalanması ilə rəsmi olaraq hərtərəfli strateji tərəfdaşlıq səviyyəsinə yüksəlmiş Rusiya-İran münasibətlərinin ikitərəfli gündəliyini ətraflı müzakirə edəcəklər”.
“Danışıqlar zamanı enerji və nəqliyyat sektorlarında əsas birgə layihələrin həyata keçirilməsi kontekstində qarşılıqlı faydalı ticarət-iqtisadi əməkdaşlığın daha da genişləndirilməsinə xüsusi diqqət yetirilməsi planlaşdırılır”, – Rusiya Xarici İşlər Nazirliyi qeyd edib. Onların Suriya, Zaqafqaziya, Əfqanıstan, Yəmən, Fars körfəzindəki vəziyyət, Yaxın Şərq nizamlanması, Xəzər problemi, İranın nüvə proqramı üzrə Birgə Hərtərəfli Fəaliyyət Planı da daxil olmaqla bir sıra aktual beynəlxalq məsələlər üzrə fikir mübadiləsi aparacağı gözlənilir”.
