İran Vaşinqtonla danışıqlardan imtina etmir, lakin onun üçün sərfəli olmayan şərtlərlə danışıqlar aparmaq fikrində deyil. Vətəninfo.az xəbər verir ki, bu barədə ölkə prezidenti Məsud Pezeşkian bildirib.
“Bəziləri deyir ki, bizim ABŞ-la danışıqlar masasına oturmaqdan başqa seçimimiz yoxdur”. Amma biz danışmayacağımızı da israr etmədik. “Biz sadəcə dedik ki, quldurlar qarşısında özümüzü alçaltmayacağıq”, – prezidentin mətbuat xidməti onun sözlərindən sitat gətirib.
Pezeşkian vurğulayıb ki, bir tərəfə silahı yerə qoymağı təklif etdikdə, digər tərəfin hər an zərbə endirə biləcəyini biləndə danışıqların məntiqi pozulur.
Dünən İranın xarici işlər naziri Abbas Əraqçi rusiyalı həmkarı Sergey Lavrov ilə keçirdiyi mətbuat konfransında Vaşinqtonun maksimum təzyiq siyasətini davam etdirdiyi müddətcə Tehranın ABŞ-la nüvə sazişini müzakirə etməyəcəyini açıqlayıb.
Nüvə sazişi (JCPOA) 2015-ci ildə Böyük Britaniya, Almaniya, Çin, Rusiya, ABŞ, Fransa və İran tərəfindən imzalanıb. Lakin 2018-ci ildə prezident Donald Trampın dövründə ABŞ sazişdən çıxdı və sanksiyaları bərpa etdi. Buna cavab olaraq Tehran bir sıra məhdudiyyətlərdən, o cümlədən uranın zənginləşdirilməsi səviyyəsi ilə bağlı məhdudiyyətlərdən imtina edərək, öz öhdəliklərini tədricən azaltmağa başlayıb.
Fevral ayında Tramp hərbi addım atmaq əvəzinə İranla yeni saziş bağlamağa hazır olduğunu bəyan etmişdi.
Fevralın 25-də Rusiya prezidenti Vladimir Putinin mətbuat katibi Dmitri Peskov İranın İRNA xəbər agentliyinə müsahibəsində deyib ki, Moskva Tehrana nüvə proqramı ilə bağlı məsələlərin həllində kömək etməyə hazırdır.
