Rusiya Federasiyasının ən iri şəhərləri olan Moskva və Sankt-Peterburqda mənzil kirayəsi bazarında kəskin bahalaşma gözlənilir. Ekspertlərin proqnozuna görə, kirayə qiymətləri sentyabrın əvvəlində 10-20% arasında artacaq. Vətəninfo.az xəbər verir ki, bu barədə SHOT məlumat yayıb.
Artımın əsas səbəbləri kimi mövsümi faktorlar və kirayə təklifinin azalması göstərilir. Payızın başlanğıcı ilə əlaqədar olaraq tələbələr meqapolislərə geri qayıdır, eyni zamanda yay tətilindən dönən ailələr yeni yaşayış yeri axtarışına başlayırlar. Bu isə kirayə mənzillərə olan tələbatın kəskin şəkildə yüksəlməsinə səbəb olur.
Avqust ayında artıq kirayə qiymətlərində 5-7% artım qeydə alınıb. Sentyabrda isə bu artımın daha da sürətlənəcəyi, xüsusilə kütləvi bazar seqmentində qiymətlərin 20%-dək yüksələcəyi bildirilir.
Bununla yanaşı, premium və elit mənzil seqmentində vəziyyət fərqlidir. Ekspertlərə görə, bu kateqoriyada kirayə tələbi nisbətən aşağı olaraq qalır. Nəticədə, elit mənzillərin kirayə qiymətlərində yalnız 3-5% civarında artım proqnozlaşdırılır.
Analitiklər qeyd edirlər ki, mövsümi dalğalanmalar fonunda xüsusilə tələbələrin və orta gəlirli ailələrin yerləşmək istədiyi yaşayış yerlərində qiymət artımı daha çox hiss olunacaq.
