Texnologiyanın gündəlik həyata dərin şəkildə inteqrasiya olunması bir çox insanın cihazlarını daim enerji şəbəkəsinə qoşulu vəziyyətdə saxlamasına səbəb olur. Neighbourly şirkətinə daxil olan Mr. Appliance firmasının prezidenti Glenn Lewis bildirib ki, ağıllı ev cihazları həyatımızın o qədər vacib hissəsinə çevrilib ki, insanlar onları söndürmək barədə çox vaxt düşünmürlər.
Mütəxəssislərin sözlərinə görə, bu, təkcə “ağıllı” cihazlara deyil, telefon şarj cihazları kimi gündəlik istifadə olunan əşyalara da aiddir. Onların fikrincə, əgər telefon enerji ilə doldurulmur, onu elektrik şəbəkəsindən çıxarmaq daha məqsədəuyğundur.
Enerji mütəxəssisi Daniel Mok bildirir ki, uzaqda olduğunuz zaman Alexa, Google Home kimi ağıllı ev cihazlarını, eləcə də vacib funksiyaları yerinə yetirməyən digər sistemləri söndürmək lazımdır:
> “Cihazlar söndürülmüş görünsə də, əgər əlinizlə toxunduqda isti qalırsa, bu o deməkdir ki, hələ də enerji sərf edir.”
İşıqlandırmada ağıllı vərdişlər
South Jersey Gas & Elizabethtown Gas şirkətinin HVAC müqavilə meneceri Bill Taylor bildirir ki, otaqdan çıxarkən işıqları söndürmək sadə, lakin təsirli enerji qənaəti üsuludur.
“Evdə olduğunuz zaman belə, işıqlandırmadan ağıllı şəkildə istifadə etmək həm enerji sərfiyyatını, həm də xərcləri azaldır,” – deyə o vurğulayıb.
Kondisioner və hava təmizləyicilərinə diqqət
Bir çox insan evlərini sərin və təravətli saxlamaq üçün kondisionerlərdən və hava təmizləyicilərindən ilboyu istifadə edir. Lakin mütəxəssislər bildirirlər ki, siz evdə olmadığınız zaman bu cihazların işləməsinə ehtiyac yoxdur.
Daniel Mok tövsiyə edir:
“Tətilə və ya uzunmüddətli səfərə çıxmazdan əvvəl bütün fanları və təmizləyiciləri elektrik enerjisindən ayırın. Evdə sakin olmadıqda, otağın soyudulmasına və havanın təmizlənməsinə ehtiyac qalmır.”
Ekspertlərin yekdil fikrinə görə, cihazları lazımsız yerə enerji şəbəkəsinə qoşulu saxlamaq həm elektrik sərfiyyatını artırır, həm də uzunmüddətli perspektivdə cihazların ömrünü azalda bilər.
