Bu gün Estoniyanın şimalında və şimal-şərqində, Rusiya ilə sərhədlərin yaxınlığında ittifaq qoşunlarının hərəkəti və əməkdaşlığının gücləndirilməsi üçün “Pikne” adlı iki həftəlik böyük NATO təlimi başlayacaq.
“Təlim zamanı Fransa, Böyük Britaniya və Estoniya qüvvələrinin sürətlə köçürülməsi, eləcə də onlar arasında əməkdaşlığın gücləndirilməsi tətbiq olunacaq. Fransa Silahlı Qüvvələrinin bölmələri qüvvələrin Estoniyaya köçürülməsi üçün quru və hava əməliyyatları keçirəcək, bundan sonra Britaniya və Estoniya bölmələri ilə birlikdə verilən tapşırıqları yerinə yetirmək üçün təlimlər keçirəcəklər”, – Estoniya diviziyasının komandiri və hərbi əməliyyatlara cavabdeh general-mayor Indrek Sirel bildirib.
“Pikne” təlimi NATO-nun Baltik dənizi regionunda NATO-nun yerləşdirilməsi və əməkdaşlıq imkanlarına diqqət yetirən “Brilliant Eagle” proqramının bir hissəsidir. Burada Estoniya, Latviya, ABŞ, Fransa və Böyük Britaniyadan 2 minə yaxın hərbçi iştirak edəcək. Estoniyada dislokasiya olunmuş, Britaniya, Fransa və İslandiyadan olan hərbçilərin daxil olduğu çoxmillətli NATO döyüş qrupu iştirak edəcək.
Dekabrın 2-8-də “Pikne”nin bir hissəsi olaraq NATO Hərbi Hava Qüvvələri Estoniyanın hava məkanında qırıcı və nəqliyyat təyyarələrində, o cümlədən aşağı hündürlükdə təlim uçuşları həyata keçirəcək.
