Dünən Rusiyanın bütün ərazisində Aleksey Navalnıya dəstək nümayişləri zamanı 55-i Moskvada olmaqla 100-dən çox adam saxlanılıb. Vətəninfo.az xəbər verir ki, bu barədə “OVD-İnfo” məlumat yayıb.
Moskvada digərləri ilə yanaşı, əllərində “Ad günün mübarək” yazısı olan şarlar, eyni yazı olan bannerlər, həmçinin “Rusiyanın xilası” köynəkləri və “ŞİZO” yazısı olan gödəkçələr geyinərək Puşkin meydanına gələnlər saxlanılıb. Qeyd olunur ki, Sankt-Peterburqda azı 12 vətəndaş saxlanılıb, onlar da həbsxanada Rusiyanın tanınmış müxalifətçisinə dəstək ifadə ediblər.
Bundan əvvəl Aleksey Navalnının komandası müxalifət liderinin doğum günündə iyunun 4-də onun müdafiəsi üçün mitinq keçirəcəyini bəyan etmişdi.
Onu da əlavə edək ki, dünyanın 120 şəhərində Navalnıya dəstək aksiyaları keçirilir. Artıq Yaponiya, Avstraliya, Ermənistan, Gürcüstan və ABŞ-ın bəzi şəhərlərində mitinqlər keçirilib. Rusiyada aksiyalar əsasən Xabarovsk, Krasnoyarsk, Rostov-na-Donu, Kalininqrad, Yekaterinburq, Omsk, Saratov, Moskva və Sankt-Peterburqda keçirilir.
