“Ukrayna Silahlı Qüvvələrinin keçmiş baş komandanı, hazırda Ukraynanın Böyük Britaniyadakı səfiri Valeri Zalujnının reytinqi Ukraynanın hazırkı prezidenti Vladimir Zelenskinin reytinqindən iki dəfə yüksəkdir. ” -Vətəninfo.az xəbər verir ki, bu barədə Rusiya prezidenti Vladimir Putin məlumat verib .
Putin Zalujni Zelenskinin mümkün olan ən yaxın siyasi rəqibi adlandırıb. Rusiya prezidenti hesab edir ki, “Zelenskinin seçkilərdə qalib gəlmək şansı yoxdur, təbii ki, saxtakarlıq olmasa, onlar 0-a bərabərdir”.
O, həmçinin bildirib ki, “Ukrayna dövlətçiliyinin qorunub saxlanmasının” əleyhinə deyil, lakin onun üçün “Ukraynanın Moskvanı təhdid etməyə öyrəşməməsi” vacibdir.
Eyni zamanda Rusiya lideri Zelenskini “Ukrayna üçün zəhərli fiqur” adlandırıb.
“Zelenski Rusiya ilə danışıqları qadağan etməklə özünü çıxılmaz vəziyyətə salıb. Çünki əks halda o, hərbi vəziyyəti ləğv etməli və dərhal seçkilərə getməlidir. Biz Zelenskinin hakimiyyətdə qalmasında maraqlıyıq, çünki o, öz rejimini məhv edir”, – Rusiya prezidenti bildirib.
Xatırladaq ki, ABŞ prezidenti Donald Tramp Rusiyanın Ukraynada prezident seçkilərinin keçirilməsi ilə bağlı tələblərini dəstəkləyir. ABŞ prezidenti ötən həftə deyib ki, “Ukrayna liderinin bəyənmə reytinqi 4 faizə düşüb”. Zelenski buna cavab olaraq qeyd edib ki, sorğuya görə onun etibar reytinqi 57% təşkil edir.
