Ermənistanın yeni fundamental qanuna ehtiyacı var. Vətəninfo.az xəbər verir ki, Ermənistan Baş naziri Nikol Paşinyan Konstitusiya Günü münasibətilə erməni xalqına müraciətində deyib.
Onun sözlərinə görə, Konstitusiya ölkədə həyat qaydaları, hüquq və vəzifələr haqqında vətəndaşların kollektiv müqaviləsidir.
“Mövcud Konstitusiya vətəndaşlar arasında ciddi sosial-psixoloji gərginlik yaradır. Məlum hallara görə, bu gün Ermənistan vətəndaşları indiki Konstitusiyada onların cəmiyyətdə və dövlətdə həyat qaydaları haqqında fikirlərini əks etdirdiyinə inanmırlar. Onlar buna hakim elitanın yaratdığı və həyata keçirdiyi sənəd kimi baxırlar”, – Paşinyan bildirib.
Baş nazir qeyd edib ki, əsas problem təkcə Konstitusiyada yazılanlarla deyil, həm də onun qəbul edilməsindədir. Onun sözlərinə görə, Ermənistana xalqın özününkü hesab edəcəyi, dövlət və onunla münasibətlər haqqında fikirlərini əks etdirən yeni Konstitusiya lazımdır.
“Bizə xalqla – onun yaradıcısı ilə üzvi şəkildə bağlı olacaq yeni Konstitusiya lazımdır”, – Paşinyan bildirib.
O, həmçinin qeyd edib ki, yeni Konstitusiya məsələsi tez-tez spekulyasiya predmetinə çevrilir. Buna baxmayaraq, baş nazir vurğulayıb ki, ölkədə institusional, psixoloji və fiziki sabitliyin möhkəmləndirilməsi istiqamətində işi davam etdirmək lazımdır.
Paşinyan Ermənistan Respublikasını beynəlxalq səviyyədə tanınmış ərazilərdə azadlıq, firavanlıq, xoşbəxtlik və təhlükəsizliyi təmin etmək üçün alət kimi yaradan “əsl Ermənistan” xalqının maraqlarına diqqət yetirməyə çağırıb.
Bakı dəfələrlə bəyan edib ki, İrəvanla sülh müqaviləsi bağlamağa əsas maneə Ermənistanın Konstitusiyasında və digər qanunvericilik aktlarında Azərbaycana qarşı ərazi iddialarının saxlanmasıdır.
