İsrail nümayəndə heyəti Qəzza zolağında atəşkəsə nail olmaq məqsədi ilə Fələstinin Həmas hərəkatı ilə bu həftə planlaşdırılan danışıqlarda iştirak etməkdən imtina edib. Vətəninfo.az xəbər verir ki,bu barədə “Politico” qəzeti mənbələrə istinadən məlumat yayıb.
Onların məlumatına görə, daha əvvəl yəhudi dövlətinin rəhbərliyi ABŞ-a danışıqlara nümayəndə heyəti göndərmək niyyətini təsdiqləsə də, İsrail nümayəndə heyəti məsləhətləşmədə iştirakdan imtina edib. Politico mənbələri bildirir ki, Ağ Ev İsrail və HƏMAS-ın razılığa gəlməyə yaxın olduğuna inandıqları üçün imtinadan məyus olub. Eyni zamanda, İsrail qərarın səbəblərini açıqlamaqdan imtina edib.
Qəzet xatırladıb ki, bu həftənin əvvəlində ABŞ rəhbərliyi danışıqları asanlaşdırmaq üçün ABŞ Mərkəzi Kəşfiyyat İdarəsinin (MKİ) direktoru Uilyam Bernsin regiona göndərilməsini nəzərdən keçirib. Lakin Ağ Ev onun səfərini hələ yekunlaşdırmayıb.
“Politico”nun yazdığına görə, İsrail və HƏMAS arasında müzakirə olunan razılaşmanın bəndləri ABŞ prezidenti Co Baydenin planındakı ilə geniş şəkildə oxşardır. Bununla belə, son bir neçə həftə ərzində İsrail və Həmas nümayəndələri əlavə güzəştə gediblər. Qəzet qeyd edir ki, danışıqlar aparanların nə vaxt şəxsən görüşəcəyi barədə hələlik məlumat yoxdur.
