Kremldə MDB-yə üzv ölkələrin dövlət başçılarının sammiti çərçivəsində Rusiya prezidenti Vladimir Putin Azərbaycan prezidenti İlham Əliyevlə görüşüb.
Vətəninfo.az xəbər verir ki, Rusiya tərəfdən görüşdə baş nazirin müavini Aleksey Overçuk, Xarici İşlər və Energetika nazirliklərinin rəhbərləri Sergey Lavrov və Sergey Tsivilev, Rusiya Federasiyası Prezidentinin köməkçisi Yuri Uşakov və Rusiya liderinin mətbuat katibi Dmitri Peskov iştirak edib.
“Dərhal qeyd etmək istərdim ki, əlaqələr müsbət istiqamətdə inkişaf edir, biz bunu hətta Azərbaycana səfərimiz zamanı da qeyd etmişik: ticarət dövriyyəsi 4-4,3 milyard dollardan çoxdur, Azərbaycan iqtisadiyyatına birbaşa sərmayələrimiz 4 milyarddan çoxdur, həm enerji sektorunda, həm də infrastrukturun inkişafı sahəsində maraqlı layihələrimiz var. Onların hamısı perspektivlidir, hamısı real, canlı layihələrdir – həm ikitərəfli, həm də çoxtərəfli.
Biz çox şadıq ki, MDB dövlət başçılarının görüşü çərçivəsində bu gün cari işlər haqqında məlumat mübadiləsi aparmaq və bəlkə də bu irəliləyişin konturlarını müəyyənləşdirmək və müəyyən düzəlişlər etmək imkanımız var, bu, göz qabağındadır”, – Putin deyib.
Əliyev dünənki qeyri-rəsmi şam yeməyinə görə Putinə təşəkkür edib və bir daha onu ad günü münasibətilə təbrik edib.
Putin Əliyevi BRİKS sammiti üçün Kazana dəvət edib.
