Ukrayna prezidenti Volodimir Zelenski Rusiyanın Kursk bölgəsindəki münaqişələrə toxunaraq “Rusiya da müharibəni hiss etməlidir” deyib.
Zelenski bildirib ki, Ukrayna Silahlı Qüvvələrinin Ali Baş Komandanı Aleksandr Sirskidən əməliyyatın səmərəli nəticələr verdiyi barədə məlumat alıb. “Ukraynanın mövqelərini müdafiə edən və məqsədlərimizə nail olan hər bir döyüşçüyə, hər bir əsgərə və komandirə minnətdaram. Ukraynalılar öz məqsədlərinə necə çatacaqlarını bilirlər. Torpaqlarımıza müharibə gətirən Rusiya da bunu hiss etməlidir”, – deyə o bildirib.
Ukrayna prezidenti əvvəllər əsgərlər üçün istehsal edilən “Armiya+” adlı tətbiqi təqdim edərkən ordunun təəccübləndirməyi və məqsədlərinə çatmağı bildiyini söyləyib və əsgərlərin pilotsuz təyyarələrdən istifadə də daxil olmaqla yeni üsullar öyrəndiyini diqqətə çatdırıb.
V.Zelenski müşaviri Mixail Podolyakın avqustun 8-də Kurskda baş verən qarşıdurmaları şərh edərkən “müharibənin adi həyat formatlarını məhv etdiyi” ifadəsinə də toxunub və “Müharibə müharibədir və öz qaydaları var” deyib.
Xatırladaq ki, Ukrayna Silahlı Qüvvələri avqustun 6-da Rusiyanın Kursk vilayətinə daxil olub. Rusiya prezidenti Vladimir Putin əməliyyatı “hərtərəfli təxribat” adlandırıb.
