Bir neçə gündür ki, Ermənistanın ən böyük yükdaşıma şirkəti olan “Spajka”nın yüzdən çox yük maşınının Rusiyaya girişi dayandırılıb. Rusiya hüquq-mühafizə orqanları isə heç bir rəsmi izahat vermədən nəqliyyat vasitələrini saxlayıb.
Vətəninfo.az xəbər verir ki, Ermənistanın dövlət orqanları bəyan edir ki, Rusiyadan daşınan məhsulların keyfiyyəti ilə bağlı heç bir şikayət daxil olmayıb. Lakin siyasi dairələrdə qeyd edirlər ki, Moskvanın bu hərəkətləri siyasi səbəblərlə əlaqədar ola bilər.
Son zamanlar “Spajka” şirkətinin direktoru ABŞ-ın Ermənistandakı səfiri ilə mütəmadi olaraq görüşlər keçirir və bu əlaqələr kütləvi informasiya vasitələrində və sosial şəbəkələrdə fəal şəkildə işıqlandırılır ki, bu da Moskvanın narazılığına səbəb olur. Sonuncu görüş təxminən iki həftə əvvəl baş tutub. Şirkətin geniş yayılmış press-relizində deyilir ki, “Səfir Quinn və ABŞ səfirliyinin nümayəndə heyəti şirkətin istehsalat obyektlərinə baxış keçirib və səfərin sonunda Amerika-Ermənistan iqtisadi əlaqələrinin dərinləşməsi ilə bağlı fikir mübadiləsi aparılıb.”
“Spajka” Ermənistanın ən böyük kənd təsərrüfatı holdinqidir. Onun yük maşınlarının qarşısının alınması yalnız şirkətə deyil, həm də ölkənin kənd təsərrüfatı istehsalçılarına ciddi zərbə vurmağa, ixraca isə ciddi problemlər yaratmağa qadirdir.
