Rusiya Müdafiə Nazirliyi ölkə qoşunlarının Ukraynanın Xarkov və Sumı vilayətlərində iki yaşayış məntəqəsini nəzarətə götürdüyünü iddia edib.
Vətəninfo.az xəbər verir ki, nazirliyin 13 noyabr tarixli məlumatına görə, Xarkov vilayətindəki Kotovka və Sumı vilayətindəki Nikolskoye kəndləri Rusiya Silahlı Qüvvələrinin “Şimal” qoşun qruplaşmasının bölmələri tərəfindən ələ keçirilib.
Məlumatda əməliyyatın təfərrüatları barədə əlavə açıqlama verilməyib.
Bundan əvvəl Ukrayna Silahlı Qüvvələrinin 127-ci ayrıca mexanikləşdirilmiş briqadasının komandanlığının Xarkov istiqamətindəki itkilərlə əlaqədar hərbi qulluqçuların məzuniyyətlərini ləğv etdiyi barədə məlumat yayılmışdı.
Rusiya mediasının yazdığına görə, “Axmat” xüsusi təyinatlı dəstəsinin dron qrupunun komandiri, “Özbək” çağırış işarəli hərbçi RT-yə açıqlamasında Rusiya qüvvələrinin Xarkov vilayətində yaradılan bufer zonasında Ukrayna ordusunun maddi-texniki təminatını çətinləşdirdiyini bildirib.
Qeyd edək ki, Kotovka və Nikolskoye yaşayış məntəqələrinin nəzarətə götürülməsi ilə bağlı məlumat hələlik Rusiya Müdafiə Nazirliyinin açıqlamasına əsaslanır. Məlumatın müstəqil təsdiqi barədə açıqlama yoxdur.
