ABŞ Prezidenti Donald Tramp ABC və NBC televiziya kanallarını “saxta xəbərlər” yaymaqda və fəaliyyətini qərəzli şəkildə işıqlandırmaqda ittiham edib. Vətəninfo.az xəbər verir ki, Tramp bu fikirlərini Truth Social sosial şəbəkəsində paylaşıb və həmin kanalların Federal Kommunikasiya Komissiyası (FCC) tərəfindən lisenziyalarının ləğv edilməsini tələb edib.
“ABŞ tarixində ən uğurlu səkkiz aylıq prezidentlik dövrü keçirdiyimə baxmayaraq, ABC və NBC FAKE NEWS kanalları haqqında 97% mənfi xəbərlər yayırlar. Əgər bu belədirsə, deməli onlar Demokrat Partiyasının bir silahına çevriliblər və bir çoxlarının razılığı ilə FCC lisenziyalarından məhrum edilməlidirlər”, – deyə Tramp bildirib.
Prezidentin sözlərinə görə, bu media orqanları ölkə demokratiyası üçün real təhlükə yaradır.
“ABC və NBC FAKE NEWS – dünyada ən pis və qərəzli iki kanal – niyə hər il milyonlarla dollar lisenziya haqqı ödəmirlər? Onlar respublikaçılara və ya mühafizəkar dairələrə qarşı ədalətsiz xəbər yaydıqları üçün lisenziyalarını itirməlidirlər. Ən azından, ABŞ-ın ən dəyərli efir tezliklərindən istənilən vaxt və istənilən yerdə istifadə etmək imtiyazı üçün böyük məbləğlər ödəməlidirlər. Cinayətkar ‘jurnalistika’ mükafatlandırılmamalı, dayandırılmalıdır!” – deyə Tramp vurğulayıb.
Eyni zamanda Tramp qeyd edib ki, “saxta xəbərlərdə deyilənlərə” baxmayaraq, hazırda rəy sorğularında prezidentliyi dövründəki ən yüksək nəticələri göstərir.
