Su məkanları uzun illərdir insan üçün gündəlik həyatın tempindən uzaqlaşmağın və dincəlməyin ən təsirli yollarından biri hesab olunur. Son dövrlərdə isə suyun insanın fiziki və psixoloji rifahına müsbət təsiri daha çox diqqət çəkir. Bu yanaşma son illərin diqqətçəkən səyahət trendlərindən biri olan “Blue Mind” konsepsiyasının geniş yayılmasına səbəb olub. Təbiətlə təmasda olmağı və həm fiziki, həm də zehni baxımdan yenilənməyi hədəfləyən səyahətlərə maraq artır. Bu istirahət anlayışında intensiv sağlamlıq proqramlarından daha çox su üzərində və sahil boyunca yaşanan sadə, təbii təcrübələr ön plana çıxır. Sahil boyunca qayıqla səyahət etmək, səhər saatlarında dənizdə üzmək və ya dəniz kənarında sakit gəzintiyə çıxmaq istirahətin ən yaddaqalan anlarına çevrilir. Elmi araşdırmalar da suya yaxın məkanda qısa müddət keçirməyin stressin azalmasına, əhval-ruhiyyənin yaxşılaşmasına və zehni aydınlığın artmasına müsbət təsir etdiyini göstərir.
Egey və Aralıq dənizi sahilləri boyunca uzanan minlərlə kilometrlik sahil xətti Türkiyəni “Blue Mind” təcrübəsini yaşamaq üçün əlverişli istiqamətlərdən birinə çevirir. Burada mavi səyahətin çoxəsrlik ənənəsi ilə dənizin sakit ritminə uyğun istirahət etmək, gizli koylar boyunca üzmək, firuzəyi rəngli körfəzlərdə lövbər salmaq və təbiətlə baş-başa qalmaq mümkündür. Türkiyənin ən maraqlı mavi səyahət marşrutları dəniz, təbiət və sakitliyi bir araya gətirərək ziyarətçilərə fərqli istirahət təcrübəsi təqdim edir.
Türkiyənin qərb sahilləri boyunca şimaldan cənuba uzanan mavi səyahət marşrutu hər dayanacaqda fərqli mənzərə və təəssürat təqdim edir. Səyahət Egey dənizinin sərin mehinin, mənzərəli sahil şəhərlərinin və kristal kimi təmiz körfəzlərin bir araya gəldiyi İzmir şəhərindən başlayır. Egeyin incisi kimi tanınan İzmir möhtəşəm yelkən marşrutları ilə də diqqət çəkir. Şəhər zeytun və şərab marşrutları, Egey mətbəxi və “MICHELIN” ulduzlu restoranları ilə yanaşı, füsunkar kurort şəhərləri ilə də seçilir. Onların arasında ən məşhurlarından biri Çeşmədir. Burada Ilıca, Ayayorgi, Pırlanta, Boyalık körfəzləri və Eşək adası kimi göz oxşayan məkanlarda lövbər salaraq dənizin və günəşin dadını çıxarmaq mümkündür. Çeşmədə olarkən dünyanın aparıcı külək sörfü məkanlarından biri hesab olunan yaxınlıqdakı Alaçatı şəhərini də ziyarət etmək tövsiyə olunur.
Gününüzü Çeşmə yarımadasının digər incilərindən biri olan Urla şəhərində yaddaqalan axşamla tamamlaya bilərsiniz. Buradakı “MICHELIN” tərəfindən tanınan restoranlarda yerli və üzvi məhsullardan, təzə dəniz məhsullarından və Egey otlarından hazırlanan “fermadan süfrəyə” konsepsiyalı yeməkləri yerli şərablarla birlikdə dadmaq mümkündür.
Marşrut Muğla istiqamətində davam etdikcə növbəti əsas dayanacaq Türkiyədə mavi səyahət ənənəsinin yarandığı Bodrum olur. Lüks hotelləri, təmiz çimərlikləri və “MICHELIN” tərəfindən tanınan restoranları ilə seçilən Bodrum, eyni zamanda Egey dənizinin ən gözəl yelkən marşrutlarına çıxış imkanı yaradır. Gümüşlük, Bitez, Yalıkavak, Göltürkbükü və Orak adası ətrafındakı sular bu baxımdan xüsusilə diqqət çəkir. Ənənəvi türk qayıqlarından olan qayıqla – qületlə səyahət edənlər firuzəyi rəngli koylarda lövbər salaraq günlərini sakit şəkildə keçirə, dənizdə üzə, şnorkellə dalış edə və sualtı aləmin zənginliyini kəşf edə bilərlər. Bodrumdan sonra marşrut Gökova körfəzinə doğru uzanır. Burada Maden körfəzi, İngilis limanı, Dovşan adası və Akyaka kimi təbiət və sakitliyi ilə seçilən məkanlar səyahətçiləri gözləyir.
Bougainvillea çiçəkləri ilə bəzədilmiş küçələri və ağ rəngli evləri ilə tanınan Bodrum yalnız dəniz istirahəti ilə məhdudlaşmır. Mavi Bayraqlı çimərlikləri, zəngin Egey mətbəxi və tarixi abidələri şəhərin əsas cazibə məkanları sırasındadır. Səyahətə məşhur Sualtı Arxeologiya Muzeyinin yerləşdiyi Bodrum qalasını ziyarət etməklə başlaya, daha sonra Qədim Dünyanın Yeddi Möcüzəsindən biri hesab olunan Halikarnas Mavzoleyinin qalıqlarına baş çəkə bilərsiniz. Günün sonunda isə zeytun yağlı Egey mətbəxinin özünəməxsus təamlarını və təzə dəniz məhsullarını dadmaqla Bodrum səyahətini tamamlayın.
Qədim zeytun bağları və badam ağacları ilə əhatələnən Datça ənənəvi daş evləri, daş döşənmiş küçələri və toxunulmaz sahil xətti ilə sakitliyi sevənlərin diqqətini çəkən füsunkar yarımadadır. Sahil boyunca dəniz səyahəti zamanı Palamutbükü, Hayıtbükü və Akvarium körfəzi kimi gözdən uzaq və sakit koylar kəşf olunur. Kristal kimi şəffaf suları ilə seçilən bu məkanlar üzgüçülük, şnorkellə üzgüçülük və dalğıclıq üçün əlverişli imkanlar yaradır. Səyahət buradan Marmarisə doğru davam edir. Kumlubük, Sərçə limanı, Sedir adası və Bördübet kimi mənzərəli lövbər dayanacaqları isə sakitlik, təbiətin gözəlliyi və macəra hissini bir arada yaşamaq istəyənlər üçün fərqli təcrübələr vəd edir.
Knidos sahillərinə çatdıqda dənizə açılan möhtəşəm mənzərəsi ilə seçilən qədim şəhəri kəşf edə bilərsiniz. Burada Afrodita məbədi və dənizə baxan qədim teatrın qalıqları yerləşir. Bu məkan Egey sahillərində gün batımını izləmək üçün ən yaddaqalan ünvanlardan biri hesab olunur. Marmarisdə isə sahilə çıxaraq şəhərin tarixi simvollarından biri olan Marmaris qalasını ziyarət etmək mümkündür. Hazırda burada fəaliyyət göstərən Marmaris Muzeyində bölgənin zəngin dənizçilik və arxeoloji irsi ilə yaxından tanış olmaq olar.
Muğlada mavi səyahət marşrutunun ən diqqətçəkən dayanacaqlarından biri Fəthiyə körfəzidir. Bu dəniz səyahətinin mərkəzində isə dünya səviyyəli marinaları ilə tanınan Göcek yerləşir. Buradan Göcek adası, Yassıca adaları, Bedri Rəhmi körfəzi, Tərsanə adası və Boynuzbükü körfəzi kimi kristal təmiz suları ilə seçilən məkanlara doğru yola çıxmaq mümkündür. Yaxınlıqda yerləşən Kleopatra hamamlarının su altında qalmış qalıqları isə üzgüçülük və şnorkellə dalış üçün fərqli təcrübə təqdim edir. Göcekdən sonra səyahəti Fəthiyə istiqamətində davam etdirmək, Katrancı körfəzi, məşhur Ölüdəniz lagünü və sakitliyi ilə seçilən Kabak körfəzi kimi təbiət möcüzələrini kəşf etmək olar.
Göcek yaxınlığındakı Dalyan qəsəbəsi ziyarətçilərə qədim Kaunos şəhərini kəşf etmək imkanı yaradır. Qayalara oyulmuş məzarları ilə tanınan Kaunosun ardınca Aralıq dənizinin nəsli təhlükə altında olan Caretta caretta dəniz tısbağalarının əsas yuvalama məkanlarından biri olan İztuzu çimərliyinə baş çəkmək mümkündür. Fəthiyədə isə firuzəyi suların üzərində yamac paraşütü ilə uçaraq Ölüdənizin möhtəşəm mənzərəsini yüksəklikdən seyr etmək səyahətin ən yaddaqalan anlarından birinə çevrilə bilər.
Türkiyə Rivierasının mərkəzi olan Antalya mavi səyahəti başa vurmaq üçün ən ideal istiqamətlərdən biridir. Firuzəyi rəngli dənizlə Aralıq dənizinin möhtəşəm təbiət mənzərələrinin qovuşduğu bu bölgədə Kaş və Kekova arasındakı marşrut xüsusi diqqət çəkir. Səyahət Limanağzı, Göyərçin adası, Aperlay, Tərsanə körfəzi, Üçağız və Kaleköy kimi sakit koylar və mənzərəli dayanacaqlardan keçir. Yol boyunca kristal təmiz sularda üzmək, zəngin sualtı aləmi kəşf etmək və dənizin altında qorunan tarixi irslə tanış olmaq səyahətə xüsusi rəng qatır. Dünyanın ən məşhur dalğıclıq məkanlarından biri olan Kaş rəngarəng rifləri və tarixi gəmi qalıqları ilə sualtı kəşflər üçün geniş imkanlar yaradır. Kekovada isə məşhur Batıq Şəhərin üzərində dəniz kayakından istifadə etməklə bölgənin qədim tarixinə fərqli rakursdan nəzər salmaq mümkündür.
Antalya yalnız sahil və dəniz istirahəti ilə məhdudlaşmır. Bölgə möhtəşəm Aspendos qədim teatrı, Pataranın zəngin arxeoloji irsi, Mavi Bayraqlı çimərlikləri və Likya yolu boyunca uzanan füsunkar mənzərələri ilə də seçilir. Səyahəti isə Aralıq dənizi mətbəxinin özünəməxsus ləzzətləri ilə tamamlamaq olar. Təzə dəniz məhsulları, mövsümi məhsullar və yerli dadlarla zəngin mətbəx Antalya səfərinin sonuna xüsusi dad qatır.
