“Anadolu”nun diplomatik mənbələrə istinadən verdiyi məlumata görə, Türkiyə və Britaniya bazar ertəsi Ankarada Suriya üzrə məsləhətləşmələr aparacaq.
Mənbələr bildiriblər ki, danışıqlara Türkiyə xarici işlər nazirinin müavini Nuh Yılmaz və Böyük Britaniyanın Yaxın Şərq üzrə dövlət katibi Hamiş Falkoner rəhbərlik edəcək.
Məsləhətləşmələr Suriya və gündəlikdəki digər regional məsələlərə həsr olunacaq. Yılmazın Suriyadakı təhlükəsizlik, sabitlik və iqtisadi vəziyyətlə bağlı Türkiyənin fikir və gözləntilərini təqdim edəcəyi gözlənilir.
Müzakirələrdə Suriya administrasiyasının mərkəzi hökumət daxilində milli barışıq istiqamətində atdığı addımlara beynəlxalq dəstəyin əhəmiyyətinin vurğulanacağı gözlənilir.
Suriyanın yenidən qurulması və iqtisadi inkişafını təşviq etmək üçün bütün sanksiyaların qeyd-şərtsiz ləğv edilməsinin zəruriliyi də vurğulanacaq.
“Danışıqlarda həmçinin vurğulanacaq ki, Suriyanın gələcəyində terrora yer yoxdur və əsas diqqət Suriyanın suverenliyini açıq-aşkar pozan və onu təhdid edən İsrail hərəkətlərinin dayandırılmasının vacibliyinə yönəldiləcək”, – Türkiyə mediası yazır.
