Ukrayna silahlı qüvvələri Zaporojye vilayətində, eləcə də Baxmut vilayətində və Svatovo yaxınlığında Luqansk istiqamətində irəliləməyə başlayıb.
Vətəninfo.az xəbər verir ki, bu barədə “Current Time” nəşrinə müsahibəsində Hərbi Hüquq Araşdırmaları Mərkəzinin rəhbəri Aleksandr Musienko bildirib. Onun sözlərinə görə, ukraynalı müdafiəçilərin məqsədi əslində Krıma quru dəhlizini kəsəcək Mariupola irəliləməkdir.
Ekspert vurğulayıb ki, əgər Ukrayna qoşunları Rusiya qoşunlarının möhkəmləndirilmiş və minalanmış mövqelərindən keçə bilsələr, bu, onların irəliləyişinin davam edəcəyindən xəbər verir.
Eyni zamanda Musienko Ukrayna əks-hücumunun mühüm məqsədləri arasında yaşayış məntəqələrinin azad edilməsini qeyd edib.
“Ukrayna qoşunları birdən çox istiqamətdə hücum əməliyyatlarını davam etdirə bilib. Ona görə də demək olar ki, indiyədək Ukrayna qüvvələri üçün hər şey kifayət qədər uğurla inkişaf edir”, – o əlavə edib.
Bundan əvvəl Ukrayna Müdafiə Nazirliyi Donetsk vilayətində üç yaşayış məntəqəsinin azad edildiyini açıqlamışdı.
