Ukrayna Müdafiə Qüvvələri ilk dəfə olaraq FPV (First Person View) tipli kamikadze dronlarla Rusiya hərbi gəmisinə uğurlu zərbə endirib. Vətəninfo.az xəbər verir ki, bu barədə Defense Express məlumat yayıb.
Hücum 28 avqustda Azov dənizinin Temryuk körfəzində baş verib. Ukraynalıların hədəfi “Kalibr” qanadlı raketləri ilə silahlanmış “Buyan-M” tipli Rusiya korveti olub.
Məlumatda qeyd olunur ki, bu hücum tarixi simvolizm daşıyır – 1952-ci ilin 28 avqustunda dünyada ilk dəfə FPV dronlardan döyüş şəraitində istifadə olunmuşdu. Elə həmin gün 2025-ci ildə Ukrayna bu taktikanı ilk dəfə dəniz hədəfinə qarşı tətbiq edərək tarixi hadisəyə imza atıb.
Hücum Ukrayna Müdafiə Nazirliyinin Baş Kəşfiyyat İdarəsinin “Prizraklar” adlı xüsusi təyinatlı bölməsi tərəfindən həyata keçirilib. Onlar “Rubaka” və ya UJ-26 “Bober” tipli FPV dronlarından istifadə ediblər. Dronlar 350 kilometrdən çox məsafə qət edərək hədəfə dəqiq zərbə endirə bilib.
Zərbə nəticəsində gəminin bort hissəsi zədələnib, eyni zamanda MP-352 “Pozitiv” radiolokasiya stansiyası sıradan çıxıb. Bu sistem gəminin dəniz və hava hədəflərini aşkarlaması üçün əsas vasitə hesab olunur. Onun işləməməsi gəmini faktiki olaraq “kor” vəziyyətə salıb.
Rusiya HHM sistemləri niyə cavab verə bilmədi?
Hücum anında gəminin heyəti təhlükəni görüb və manevrlər etməyə çalışsa da, gəmidəki hava hücumundan müdafiə (HHM) sistemləri reaksiya verməyib. Xüsusilə, AK-630M2 “Duet” tipli sürətli artilleriya kompleksi heç bir atəş açmayıb.
Səbəblər hələlik bəlli deyil. Bu, RLS sisteminin, atəşə nəzarət modulunun və ya optik tuşlama avadanlığının nasazlığı ilə əlaqədar ola bilər. Amma fakt dəyişmir – gəminin əsas HHM sistemi Ukrayna dronlarına qarşı aciz qalıb.
“Buyan-M” sinfindən olan korvetlər Rusiya Hərbi Dəniz Qüvvələrinin Qara dəniz və Xəzər donanmalarının əsas hissəsini təşkil edir. Bu sinfə daxil azı 7 gəmi Qara və Xəzər donanmasında, 4 gəmi isə Baltik donanmasında xidmət göstərir. Həmçinin, bu cür HHM sistemləri “İvan Qren” və “Pyotr Morqunov” adlı iri desant gəmilərində də quraşdırılıb.
Lakin “Buyan-M” gəmisinin məhv edilməsi, Rusiya dəniz donanmasının bu sinfə aid bütün gəmilərinin Ukraynanın FPV dronları qarşısında ciddi təhlükə altında olduğunu ortaya qoydu.
