Mahaçqalada yol polisi tərəfindən aparılan təqib zamanı bir polis əməkdaşı həyatını itirib. Hadisə şəhərin Primakov küçəsində baş verib. Vətəninfo.az xəbər verir ki, bu barədə Dağıstan Respublikası Daxili İşlər Nazirliyi məlumat yayıb.
Hadisə zamanı “Toyota Camry” markalı avtomobilin sürücüsü yol patrul xidmətinin “saxla” əmrinə tabe olmayıb. Sürücü yüksək sürətlə hərəkət edib, qarşı hərəkət zolağına çıxaraq təhlükəli manevrlər edib. Yol polisi avtomobili saxlamaq məqsədilə xəbərdarlıq atəşi açıb.
Atəş nəticəsində xidmətdə olmayan və şəxsi avtomobilində park vəziyyətində olan sahə müvəkkili başından ağır güllə yarası alaraq həlak olub. İlkin məlumatlara görə, güllə polis əməkdaşına rikoşet nəticəsində dəyib.
Dağıstan İstintaq Komitəsi hadisə ilə bağlı iki maddə üzrə cinayət işi açıldığını bildirib.
