Fevralda Rusiya cəzaçəkmə müəssisəsində dünyasını dəyişən siyasətçi Aleksey Navalnının həyat yoldaşı Yuliya Navalnaya terrorçu və ekstremistlər siyahısına daxil edilib. Vətəninfo.az xəbər verir ki , bu barədə “İnterfaks” agentliyi məlumat yayıb.
Qeyd olunur ki, “Rosfinmonitorinq” Yuliya Navalnayanı ekstremist fəaliyyət və ya terrorizmdə iştirakı barədə məlumat olan şəxslər və təşkilatların siyahısına əlavə edib.
Qanuna görə, banklar bu siyahıya daxil olan şəxslərin vəsaitlərini dondurur və onlara xidmət göstərməyi dayandırır.
Bundan əvvəl Moskvanın Basman məhkəməsi Rusiya tərəfindən beynəlxalq istintaq altında olan Navalnayanın uzaqdan həbs olunduğunu elan edib.
Navalnaya ekstremist icmaya qoşulmaqda ittiham olunub. Günahı sübuta yetirilərsə, onu ya 300 mindən 600 min rubla qədər cərimə və ya bir ildən dörd ilədək müddətə məcburi əmək və ya iki ildən altı ilədək müddətə azadlıqdan məhrum etmə cəzası gözləyir.
“İnterfaks” mənbəsinin məlumatına görə, istintaq Navalnayanı hakimiyyəti gözdən salmaq məqsədi daşıyan videolar hazırlamaqda və yaymaqda, habelə Rusiyada ekstremist kimi tanınan Korrupsiyaya Qarşı Mübarizə Fonduna ianə toplamaqda ittiham edir.
