Ukrayna prezidenti Volodimir Zelenski bu gün, 14 avqustda, Böyük Britaniyanın baş naziri Kir Starmerlə Londonda, Daundinq-stritdə görüş keçirəcək. Bu barədə Sky News məlumat yayıb.
Hələlik görüşün detalları açıqlanmasa da, Tramp və Putinin sabah Alyaskada keçirəcəyi görüşdən öncə baş tutması diqqət çəkir. Xatırladaq ki, Alyaska sammitində əsas müzakirə mövzusu Ukraynada atəşkəs məsələsi olacaq.
Tramp: “Ərazilərin bölünməsi gündəmdə deyil”
Sky News qeyd edir ki, dünən – 13 avqustda Zelenski, Starmer və digər Avropa liderləri ABŞ prezidenti Donald Trampla telefon danışığı aparıblar. Danışıq zamanı razılaşdırılıb ki, Ukraynasız Ukrayna ilə bağlı qərar verilməyəcək və ilk növbədə Kiyevə atəşkəslə bağlı təzyiq göstərilməlidir.
Digər tərəfdən, NBC Newsun məlumatına görə, Tramp jurnalistlərə bildirib ki, Putinlə görüş zamanı Ukrayna ərazilərinin bölünməsi məsələsini müzakirə etməyəcək. Tramp eyni zamanda Zelenski və Putinin birbaşa görüşünü təşkil etməyə ümid etdiyini deyib.
Gözləntilər və ehtimallar
“The Washington Post” isə sammitlə bağlı proqnoz verərək yazır ki, əgər Putin Trampın təklif etdiyi sülh şərtlərini qəbul etməsə, bu, Trampın səbir və qətiyyətlə qərar vermə qabiliyyəti üçün ciddi sınaq olacaq.
Məqalədə həmçinin qeyd olunur ki, Putin birbaşa imtina etməsə də, razılıq da verməyəcək. Onun bəzilərinə “bəli”, bəzilərinə isə “yox” deməklə prosesi uzatmağa çalışacağı istisna edilmir. Bu müddət ərzində isə Ukrayna cəbhələrinə hücumlar davam edə bilər.
