Hər il 25 noyabr – Beynəlxalq Qadınlara Qarşı Zorakılığa Son Qoyulması Günündən 10 dekabr – İnsan Hüquqları Gününədək davam edən “16 Günlük Fəallıq Kampaniyası” gender əsaslı zorakılığa qarşı qlobal mübarizənin ən əhəmiyyətli çağırışlarından biridir. Statistikalar göstərir ki, dünyada hər üç qadından biri həyatının müəyyən dönəmində fiziki və ya cinsi zorakılığa məruz qalır. Azərbaycanda isə 2023-cü ildə aparılmış araşdırmalara görə, qadınların 28%-i ailə daxilində zorakılıqla üzləşdiyini etiraf etmişdir.
Bu narahatedici rəqəmlərə qarşı həmrəylik nümayiş etdirmək məqsədilə “İnkişaf-2006” Sosial Dəstək İctimai Birliyi 2024-cü ilin noyabr-dekabr aylarında İmişli şəhərində gender əsaslı zorakılığa qarşı 16 günlük fəallıq kampaniyası təşkil etmişdir. Kampaniya çərçivəsində 200-dən çox iştirakçını əhatə edən seminarlar, psixoloji dəstək seansları, hüquqi məsləhətlər və məlumatlandırıcı aksiyalar həyata keçirilmişdir.
Dünya Sağlamlıq Təşkilatının məlumatına əsasən, zorakılığın iqtisadiyyata vurduğu ziyan hər il qlobal səviyyədə 1,5 trilyon dollara çatır. Bu, təkcə fərdi deyil, həm də iqtisadi böhrandır. Məhz buna görə də “İnkişaf-2006” İctimai Birliyinin İmişlidə keçirdiyi kampaniya gender əsaslı zorakılığın fərdi və ictimai fəsadlarının qarşısının alınmasına, cəmiyyətdə sağlam ailə mühitinin formalaşmasına və qadınların iqtisadi müstəqilliyinin təşviqinə öz töhfəsini vermişdir.
