Rumıniya kəşfiyyatı Rusiya xüsusi xidmət orqanlarının yönləndirdiyi iddia edilən diversiya şəbəkəsini ifşa etdiyini açıqlayıb. Şəbəkənin bu ilin sentyabrında Braşov şəhərində yerləşən müdafiə sənayesi müəssisəsinə qarşı yanğın törətməyə cəhd göstərdiyi bildirilir.
Vətəninfo.az xəbər verir ki, bu barədə Rumıniyanın “Digi24” telekanalı məlumat yayıb.
Məlumata görə, hadisə ilə əlaqədar ikisi Belarus, biri isə Ukrayna vətəndaşı olan üç nəfər barəsində araşdırma aparılır. Rumıniya hakimiyyəti şübhəlilərin həbsi üçün order verib. Onlardan ikisi Almaniyada, digəri isə Polşada saxlanılıb. Rumıniya tərəfi onların ölkəyə ekstradisiyasına nail olmağa çalışır.
Prokurorluğun məlumatına əsasən, şübhəlilərin təkcə Rumıniyada deyil, Avropa İttifaqının digər ölkələrində də müxtəlif obyektlərə hücumlar planlaşdırdıqları ehtimal olunur.
İstintaq çərçivəsində Rumıniyadakı mülki və beynəlxalq hərbi obyektlərə, eləcə də Ukrayna Silahlı Qüvvələrinin hərbi hazırlıq keçdiyi məkanlara qarşı mümkün diversiya cəhdləri araşdırılır.
İş üzrə araşdırmalar sentyabr ayında Braşov şəhərində, “Romarm” şirkətinin törəmə müəssisəsi olan “Carfil” zavodunun yaxınlığındakı sənaye zonasında baş verən yanğından sonra başlayıb. Yanğın nəticəsində bir neçə kommersiya şirkətinin baş ofisinə ciddi ziyan dəydiyi bildirilir.
Qeyd edək ki, 2026-cı ilin sentyabrında Rumıniya rəsmiləri 40 yaşlı Rusiya vətəndaşının saxlanılması barədə də məlumat vermişdilər. Həmin şəxs Moskvanın tapşırığı ilə diversiya hazırlamaq məqsədilə hərbi obyektlərin foto və videoçəkilişini aparmaqda şübhəli bilinirdi.
Son illərdə bir sıra Avropa ölkələri Rusiyanı Ukraynaya hərbi dəstək verən dövlətlərə qarşı diversiya, kiberhücum və dezinformasiya fəaliyyətlərində ittiham edirlər. Bu hadisələr Avropa ilə Rusiya arasındakı münasibətlərin daha da gərginləşməsinə səbəb olur.
Rusiya isə bu cür diversiya fəaliyyətlərində iştirakına dair ittihamları dəfələrlə rədd edib.
