Azərbaycan rabitə peykinə 800 milyon dollar sərmayə qoyacaq: TUSAŞ, IAI, Thales və SpaceX yekun tenderdə.
Azərbaycan kosmik və telekommunikasiya infrastrukturunun inkişafında yeni mərhələyə qədəm qoyur. Türkiyənin GDH Digital xəbər portalının məlumatına görə, ölkə təxminən 800 milyon dollar dəyərində rabitə peykinin alınması üçün irimiqyaslı müqavilə imzalamağa hazırlaşır.
Layihənin məqsədi təkcə rəqəmsal infrastrukturun modernləşdirilməsi deyil, həm də Azərbaycanı regional telekommunikasiya qovşağına çevirmək və geosiyasi mövqeyini gücləndirməkdir.
Kosmik sənayenin dörd əsas oyunçusu tenderdə iştirak edir:
– TUSAŞ (Türkiyə)
– Israel Aerospace Industries (IAI) (İsrail)
– Thales Alenia Space (Fransa-İtaliya)
– SpaceX (ABŞ)
Azərbaycanın ehtiyacları və məqsədləri
Azərbaycanın müraciətləri arasında ən yüksək beynəlxalq standartlara cavab verə biləcək – İsrailin Dror 1 peykinə bənzər peykin yaradılması və gələcək illər üçün ölkənin telekommunikasiya ehtiyaclarını ödəyən peykin yaradılması daxildir.
Bakının bu layihədə əsas məqsədi təkcə öz iqtisadiyyatını şaxələndirmək deyil, həm də qlobal kommunikasiya bazarında öz rolunu gücləndirmək və bununla da növbəti geosiyasi təsir rıçağını əldə etməkdir.
Tenderin ən görkəmli iştirakçılarından biri Türkiyənin müdafiə sənayesinin artan gücünü təmsil edən Türk Aerokosmik Sənayesi (TUSAŞ) şirkətidir.
Hazırkı mərhələdə əsas rəqabət, portalın məlumatına görə, Türkiyənin TUSAŞ şirkəti ilə İsrailin IAI şirkəti arasındadır. Sonuncu artıq Azərbaycanla əməkdaşlıq təcrübəsinə malikdir: 2023-cü ilin oktyabrında IAI Azərkosmos kosmik agentliyi ilə OptSat-500 seriyalı peyklərin tədarükü üçün təxminən 120 milyon dollarlıq müqavilə imzalayıb. Müqaviləyə həmçinin texnologiyanın ötürülməsi və azərbaycanlı mütəxəssislər üçün təlim komponentləri daxil edilib ki, bu da yekun seçimdə əsas rol oynaya bilər.
Azərbaycan artıq “Azerspace-1” və “Azerspace-2” də daxil olmaqla bir neçə peyk üzərində işləyir və rəqəmsal suverenlik və iqtisadi artım üçün uzunmüddətli strategiyanın bir hissəsi kimi yeni kosmik layihələri nəzərdən keçirir.
Tenderlə bağlı yekun qərarın yaxın aylarda veriləcəyi gözlənilir. Layihənin həyata keçirilməsi Azərbaycanın son illərdəki ən böyük texnoloji sərmayələrindən biri olacaq və ekspertlərin fikrincə, Şərqlə Qərb arasında telekommunikasiya körpüsü mövqeyini möhkəmləndirəcək.
