Avropa Parlamenti Kosovo pasportu sahiblərinin Aİ-yə vizasız gediş-gəlişinə icazə verilməsi qərarını təsdiqlədi.
Vətəninfo.az xəbər verir ki, AP Baş Assambleyasında səsvermədən sonra verilən yazılı açıqlamada bildirilir: “Kosovo vətəndaşlarına Aİ-yə, Aİ vətəndaşlarına isə hər hansı 180 günlük müddətdə 90 günə qədər viza tələb etmədən Kosovoya səyahət etmək icazəsi verilir”.
Beləliklə, bütün Qərbi Balkanlar bölgəsi Aİ-nin vizasız səyahət zonası Şengen ilə viza azadlığı əhatəsinə daxil edildi.
Qərar rəsmi qəzetdə dərc edildikdən sonra Avropa Səyahət Məlumatı və Səlahiyyət Sisteminin (ETİAS) fəaliyyətə başladığı tarixdə və ya 1 yanvar 2024-cü ildə qüvvəyə minəcək.
Xatırladaq ki, Kosovo digər Qərbi Balkan ölkələri ilə birlikdə 2003-cü ildə Yunanıstanın Saloniki şəhərində keçirilən Aİ Liderlər Sammitində “potensial namizəd” ölkə elan edilmişdi. Ölkənin 2008-ci ildə Serbiyadan birtərəfli qaydada elan etdiyi müstəqilliyini hazırda 5 Aİ üzvü, o cümlədən Yunanıstan, Rumıniya, Slovakiya, İspaniya və Cənubi Kipr tanımır.
Kosovo 2022-ci ilin dekabrında Aİ-yə üzvlük üçün rəsmi müraciət etmişdi.
