Polşanın Baş naziri Donald Tusk cümə axşamı Seymdə qanunvericilərə xüsusi müraciətində bildirib ki, Rusiya Ukraynanın Avropa müttəfiqlərinə raket və pilotsuz təyyarələrlə hücumlar planlaşdırıb.
Vətəninfo.az xəbər verir ki, Tusk Euronews-a istinadən bildirib ki, “Kəşfiyyat məlumatlarına görə, Rusiyanın planlarına Ukraynanı dəstəkləyən ölkələrə, o cümlədən Polşaya qarşı dron və raketlərdən istifadə edərək hibrid hücumlar daxildir”. Onun sözlərinə görə, Moskva hücuma məruz qalan ittifaq üzvünü müdafiə etmək üçün “NATO ölkələrinin motivasiyasını iflic etmək və ya heç olmasa zəiflətmək” məqsədilə bu cür hücumları “təsadüfi” kimi təqdim etməyə çalışacaq.
Polşanın baş naziri bildirib ki, “NATO-nun şərq cinahında bir və ya daha çox ölkənin ərazisinin dronların [reaktiv təyyarələr də daxil olmaqla] və ya digər raket növlərinin hücumlarına məruz qalması və bunun dağıntılara səbəb ola biləcəyi real riskdir. Rəsmi versiya isə bunun qəza olması və NATO-nun hər hansı bir cavab tədbiri üçün heç bir əsasının olmaması olacaq”. Tusk əlavə edib ki, Rusiya “Ukrayna iqtisadiyyatının və logistikasının maksimum dərəcədə məhv edilməsi” məqsədini qarşısına qoyub və kəşfiyyat məlumatlarına görə, yaxın gələcəkdə Ukraynanın altı böyük şəhərinə davamlı hücumların “çox yüksək tezlikli və intensiv” olacağını gözləməliyik.
Baş nazir daha bir “çox mənfi” dəyişikliyi qeyd etdi: Rusiya ordusu tərəfindən reaktiv dronların kütləvi istifadəsinə başlandı, onlar mühərrikli təyyarələrdən daha sürətli hərəkət edir və daha yüksəkdə uçurlar. Praktikada, demək olar ki, heç kimin bu cür dronlara qarşı mübarizə aparmaq üçün kifayət qədər effektiv təlimi yoxdur və “bu işi biz də görməliyik”, – deyə o vurğuladı.
Tusk əlavə edib ki, NATO, Ukrayna və ABŞ xüsusi xidmət orqanlarından, o cümlədən Mərkəzi Kəşfiyyat İdarəsindən kəşfiyyat məlumatları alındıqca Rusiyanın Avropaya qarşı təxribat planları ilə bağlı xəbərdarlıqları daha konkret hala gəlir.
Avqust ayında “The Wall Street Journal” qəzeti ABŞ kəşfiyyatının hesabatlarına istinadən bildirib ki, Rusiya qarşıdakı illərdə alyansın üzv dövlətlərindən birinə “məhdud hücum” həyata keçirməklə “NATO-nun qətiyyətini sınamağa” çalışa bilər. Mümkün ssenarilərdən biri Baltikyanı dövlətlərdən birinə qurudan hücumdur. WSJ-nin məlumatına görə, ayın sonunda Moskvaya səfər edən Mərkəzi Kəşfiyyat İdarəsinin direktoru Con Retkliff Rusiya hakimiyyətini Baltikyanı dövlətlərə hücum etməmək barədə xəbərdar edib.
