Ukrayna Prezidenti Volodimir Zelenski ABŞ Prezidenti Donald Trampı Rusiyaya qarşı təzyiqi artırmağa çağırıb.
Vətəninfo.az xəbər verir ki, Zelenski bildirib ki, Vaşinqton Rusiyaya qarşı sanksiyaları sərtləşdirməli, Ukraynaya maliyyə və hava hücumundan müdafiə sahəsində dəstəyi gücləndirməlidir. Onun fikrincə, bu addımlar Moskvanı danışıqlar masasına qayıtmağa sövq edə bilər.
Ukrayna lideri bu barədə Böyük Britaniyanın xarici işlər, birlik və inkişaf məsələləri üzrə dövlət katibi Ed Milibandla görüşü zamanı danışıb.
Zelenskinin sözlərinə görə, Ukraynanın danışıqlar qrupu bu həftə ABŞ-a səfər edəcək. O, nümayəndə heyətinin amerikalı tərəfdaşlara Rusiyaya təzyiqin artırılmasının vacibliyi ilə bağlı müvafiq mesajlar çatdıracağını bildirib.
Ukrayna Prezidenti xüsusilə hava hücumundan müdafiə sistemlərinin gücləndirilməsini prioritet məsələ adlandırıb. O qeyd edib ki, ölkənin öz istehsalı ilə yanaşı, beynəlxalq tərəfdaşların dəstəyinə də ehtiyac var.
“Biz bütün tərəfdaşlarımıza, o cümlədən Böyük Britaniyaya siqnallar göndəririk. Hava hücumundan müdafiənin gücləndirilməsi bir nömrəli vəzifədir”, – Zelenski deyib.
Zelenski son dövrlərdə dəfələrlə Rusiyaya qarşı sanksiya təzyiqinin artırılmasının və Ukraynanın hava hücumundan müdafiə imkanlarının genişləndirilməsinin vacibliyini vurğulayıb. Ukrayna Prezidenti sentyabr ayında ABŞ Konqresinin nümayəndələri ilə görüşündə də Rusiyaya qarşı yeni sanksiyaların tətbiqinə və ballistik raketlərdən müdafiənin gücləndirilməsinə çağırmışdı.
ABŞ-da Rusiyaya qarşı sanksiyaların genişləndirilməsi ilə bağlı qanunvericilik də gündəmdədir. Ukrayna tərəfi yeni məhdudiyyətlərin, o cümlədən Rusiyanın enerji sektoruna, oliqarxlarına, banklarına və “kölgə donanması” ilə əlaqəli strukturlara qarşı tədbirlərin tətbiqini gözləyir.
Kiyev hesab edir ki, sanksiyalar, maliyyə və hərbi yardımın artırılması Rusiyaya təzyiqin əsas istiqamətlərindən biri olmalıdır. Ukrayna rəhbərliyi həmçinin qış mövsümü ərəfəsində hava hücumundan müdafiə imkanlarının genişləndirilməsini xüsusi əhəmiyyətli hesab edir.
