Britaniya hərbçiləri hərbi bazalara təhlükə yaradan pilotsuz uçuş aparatlarını (dronları) dərhal aşkarlandıqda, xəbərdarlıq etmədən məhv etmək səlahiyyəti alacaqlar. The Telegraph yazır ki, bu barədə Britaniyanın müdafiə naziri Con Hili bazar ertəsi rəsmi açıqlama verəcək.
“İnsayderlər ümid edirlər ki, bu planlar hərbçilərin dronlara cavab reaksiyası ilə bağlı bürokratik əngəlləri azaldacaq və əsgərlərə tüfənglər və digər texnologiyalar vasitəsilə onların məhv edilməsi üçün daha qətiyyətli tədbirlər görməyə imkan verəcək”, – nəşr qeyd edir.
Yeni səlahiyyətlər ilkin olaraq yalnız hərbi obyektlərə şamil ediləcək. Bununla belə, The Telegraph-a danışan mənbə bildirib ki, hökumət bu səlahiyyətlərin hava limanları kimi digər obyektlərə də şamil olunmasını istisna etmir.
Nazir Con Hilinin açıqlamasında deyilməsi gözlənilir:
“Biz britaniyalıların təhlükəsizliyini təmin etmək üçün hər zaman lazım olanı edəcəyik. Hazırda yeni səlahiyyətlər hazırlayırıq və bu, Silahlı Qüvvələr haqqında qanunda təsbit olunacaq – Britaniya hərbi obyektləri üzərində tanınmayan pilotsuz uçuş aparatlarını vurmaq hüququ veriləcək.”
Hazırda hərbi qüvvələr dronlarla mübarizə üçün xüsusi avadanlıqdan istifadə edə bilir. Bu avadanlıq yaxınlaşan dronları izləyir, onların siqnalını ələ keçirir və trayektoriyasını məcburi şəkildə dəyişdirə bilir. O, həmçinin GPS siqnallarını pozmaq imkanına da malikdir.
Lakin yeni təklifə əsasən, əsgərlər və ya Müdafiə Nazirliyinə tabe olan polis əməkdaşları dronları dərhal “kinetik imkanlarla” – yəni birbaşa fiziki şəkildə – vurmaq səlahiyyəti əldə edəcək. Hazırda bu, yalnız fövqəladə hallarda mümkündür.
Yeni səlahiyyətlərin nə vaxt qüvvəyə minəcəyi hələlik məlum deyil.
Avropada Rusiyaya məxsus dronlara qarşı mübarizə
Almaniya hökuməti daha əvvəl ölkə hava məkanında təhlükə yaradan tanınmamış dronların polis tərəfindən vurulmasına icazə verəcəyini açıqlamışdı.
Bundan əlavə, Britaniyada pilotsuz uçuş aparatları, partlayıcı ilə təchiz olunmuş kiçik pilotsuz qayıqlar və hücum helikopterlərini məhv edə bilən yeni çoxməqsədli “Martlet” raketinin sınaqları uğurla başa çatdırılıb.
