Vətəninfo.az xəbər verir ki, Fransada evsizlərin sayı keçən illə müqayisədə 20 min artaraq 350 minə çatıb. Hökumətin mənzil problemi ilə bağlı ciddi addımlar atmaması və ölkədə yaşanan hökumət böhranı, bu artıma səbəb olub. Evsizlərin sayının artması, “Abbe Pierre” kimi tanınan və hazırda “Kasıblar üçün Sığınacaq Fondu” adı altında fəaliyyət göstərən xeyriyyə təşkilatının 2025-ci il hesabatında vurğulanıb.
Hesabatda, mənzil tikintisindəki durğunluq, yüksək kirayə haqları və yoxsulların mənzil problemi ilə bağlı effektiv addımların atılmaması ilə bağlı narahatlıq ifadə edilib. 2023-cü ildə sosial mənzillə təmin edilən yalnız 393 min nəfər olduğu, hal-hazırda isə 2,7 milyon insanın sosial ev növbəsində gözlədiyi qeyd edilib.
Hökumətin böhranlardan dolayı siyasi iradə göstərməməsi, mənzil probleminin daha da dərinləşməsinə səbəb olur. 2002-2022-ci illər arasında 10 illik dövrdə evsizlərin sayı 130 faiz artıb. Keçən il 330 min olaraq qeyd edilən evsizlərin sayı bu il 350 minə çatıb.
Fransada kimsəsiz uşaqların sayı da narahatedici şəkildə artıb. 2025-ci ildə evsiz uşaqların sayı əvvəlki ilə nisbətən 6 faiz artaraq 2159-a yüksəlib. UNICEF və Həmrəylik Aktyorları Federasiyası tərəfindən yayımlanan hesabatda, 2020-ci ildə 927 olan evsiz uşaqların sayının, 2024-cü ilə qədər 2000-ni keçməsi gözlənilir. Bu artım “həyəcanverici” olaraq qiymətləndirilir, çünki kimsəsiz uşaqların təxminən dörddə biri üç yaşınadəkdir.
“Küçə Ölümləri” Cəmiyyəti 2023-cü ildə küçələrdə ölən evsizlərin sayının 735 nəfər olduğunu açıqlayıb. Bu, əvvəlki 12 ili keçən ən yüksək göstəricidir. Evsizlərin üçdə biri qış mövsümündə həyatını itirir. Evsizlərin orta ömür uzunluğu isə 48,8 il olaraq, əhalinin qalan hissəsinin 79,9 illik orta ömür uzunluğundan xeyli azdır.
Mənzil problemi ilə bağlı kifayət qədər tədbir görmədiyi üçün Fransa hökuməti tənqid edilir. Kirayə haqqının artması, Fransada mənzil çatışmazlığının əsas səbəblərindən biri olsa da, enerji və digər malların qiymətlərinin yüksəlməsi də evsizlərin vəziyyətini ağırlaşdırır. Müxalifət, prezident Emmanuel Makronu 2017-ci ildə verdiyi mənzil çatışmazlığına son qoyma vədi ilə bağlı lazımi addımları atmamaqda ittiham edir.
Fransada mənzil böhranı, 2024-cü il Paris Olimpiadaları ərəfəsində daha da aktuallaşıb. Paytaxt Parisdə və ətrafında evsizlərin müxtəlif yerlərə sövq edilməsi, insan haqları təşkilatları və mühacir birlikləri tərəfindən tənqid edilib. Bu vəziyyət, minlərlə evsiz insanın həyatı üçün daha da ağırlaşmış şərtlər yaradır.
