İsrailin Yaşar Partiyasının lideri Qadi Eisenkot müvəqqəti Baş nazir Benyamin Netanyahunu yeni hökumət formalaşanadək təxirəsalınmaz zərurət olmayan hərbi əməliyyatlardan çəkinməyə çağırıb. Tərəflər arasında bu xəbərdarlıqdan sonra açıq mübahisə yaranıb.
Vətəninfo.az xəbər verir ki, İsraildə hökumətin formalaşdırılması prosesi fonunda təhlükəsizlik siyasəti ilə bağlı siyasi gərginlik artıb.
Yaşar Partiyasının lideri Qadi Eisenkot sosial şəbəkə hesabında yaydığı açıqlamada ölkənin mürəkkəb təhlükəsizlik vəziyyətində olduğunu bildirərək müvəqqəti Baş nazir Benyamin Netanyahuya məktub ünvanladığını açıqlayıb.
Eisenkot məktubunda yeni hökumətin andiçmə mərasiminə qədər təxirə salına biləcək riskli qərarlardan çəkinməyin vacibliyini vurğulayıb.
O, Netanyahunu birbaşa, təcili və qaçılmaz təhlükə olmadığı halda təhlükəsizlik qüvvələrini hərbi əməliyyatlara cəlb etməməyə çağırıb. Siyasətçinin fikrincə, əks halda atılacaq addımlar demokratiya və vətəndaşların dövlət institutlarına etimadı baxımından ciddi nəticələr doğura bilər.
Eisenkot həmçinin Netanyahuya təhlükəsizlik qurumlarının rəhbərlərini şəxsi siyasi gözləntilərlə dövlət maraqları arasında seçim qarşısında qoymamağı tövsiyə edib.
Eisenkotun xəbərdarlığı İsrail hökumətində narazılıqla qarşılanıb.
Netanyahunun ofisindən yayılan açıqlamada hökumətin bütün qərarlarının təhlükəsizlik mülahizələri əsasında və müvafiq təhlükəsizlik qurumları ilə tam koordinasiyada qəbul edildiyi bildirilib.
Bəyanatda Eisenkot həssas təhlükəsizlik məsələlərini ictimai müzakirəyə çıxarmaqda və məsuliyyətsiz davranmaqda ittiham olunub.
Yaşar Partiyasının lideri hökumət ofisinin ittihamlarına cavab olaraq təhlükəsizlik məsələləri ilə bağlı rəsmi brifinq tələb etdiyini, lakin müraciətinin rədd olunduğunu bildirib.
O, həmçinin Netanyahunun İsrail Knessetinin Xarici İşlər və Müdafiə Komitəsinin iclasını təxirə salmağa çalışdığını iddia edib.
Beləliklə, İsraildə yeni hökumətin formalaşdırılması ərəfəsində hərbi qərarların qəbulu və təhlükəsizlik siyasəti ətrafında siyasi fikir ayrılıqları daha da dərinləşib.
