Politoloq Elxan Şahinoğlunun fikrincə, Ermənistanda keçmiş prezidentlər Robert Köçəryan və Serj Sərkisyan müəyyən müddət susqun qaldıqdan sonra yenidən eyni gündə – oktyabrın 7-də fəallaşıblar. Hər iki siyasi fiqurun eyni vaxtda səhnəyə çıxması təsadüf deyil və onların gələn ilin iyun ayında keçiriləcək parlament seçkilərinə hazırlaşdıqlarının göstəricisidir.
Robert Köçəryan mətbuat konfransı keçirərək Baş nazir Nikol Paşinyanı hədəfə alan sərt və aşağılayıcı fikirlər səsləndirib. Həmin gün eyni məzmunlu açıqlamalar Serj Sərkisyandan da gəlib. Elxan Şahinoğlu bu paralel çıxışları təsadüfi saymır və bildirir ki, hər iki şəxs Paşinyana alternativ olmaq niyyətindədir. Lakin politoloqun sözlərinə görə, bu rəqiblər Paşinyan üçün ciddi təhlükə daşımır, əksinə, onun üçün arzuolunan fiqurlardır:
“Nikol Paşinyana elə bunlar kimi rəqiblər lazımdır, üzərlərində növbəti dəfə qələbə çala bilsin. Paşinyan dünən “deyin görək, nə vaxt mənimlə debata çıxacaqsınız” cümləsi ilə ikisini də növbəti dəfə susdurub.”
Elxan Şahinoğlu qeyd edir ki, Köçəryan və Sərkisyan Paşinyanı tənqid etsələr də, onunla birbaşa debatdan çəkinirlər. Sərkisyan hakimiyyətdə olduğu dövrdə yalnız bir dəfə Paşinyanla mətbuatın qarşısında görüşə razı olmuş, bundan bir neçə gün sonra isə istefa verməyə məcbur olmuşdu. Bu təcrübə göstərir ki, hər iki şəxs Paşinyanla üz-üzə debatın onlar üçün mənfi nəticələnəcəyini anlayır və ona görə də bundan yayınırlar.
Politoloq əlavə edir ki, Robert Köçəryan mətbuat konfransından əvvəl Moskvada olub və Kremldə qapalı görüşlər keçirib. O, Rusiya Prezidenti Vladimir Putinin yaxın dostudur. Elxan Şahinoğlu hesab edir ki, Kremlin bu görüş barədə məlumatı mediaya ötürməməsi təsadüfi deyil:
“Putin də anlayır ki, yaxın dostunun Ermənistanda reytinqi yoxdur. Buna baxmayaraq, Kreml Nikol Paşinyanın gələcək parlament seçkisində məğlub olması və ya təkbaşına hökumət formalaşdıra bilməməsi üçün müxtəlif ssenarilər üzərində işləyir. Köçəryanı da bu məqsədlə Moskvaya çağırıblar.”
Bu açıqlamalara əsasən, Ermənistan daxilində və xaricində növbəti seçkilərlə bağlı ciddi siyasi hazırlıqlar və gizli planlar gedir. Köçəryan və Sərkisyanın yenidən səhnəyə çıxması, həmçinin Kremlin bu prosesdəki mümkün iştirakı, Ermənistanın qarşıdakı dövrdə daha da gərgin siyasi mühitə qədəm qoyacağını göstərir.
