ABŞ prezidenti Donald Tramp bildirib ki, Vaşinqtonun Ukraynada müharibəyə son qoymağa yönəlmiş təklif etdiyi sülh planına etiraz edən yeganə şəxs Ukrayna prezidenti Vladimir Zelenskidir. Onun sözlərinə görə, Kiyev komandası sənədə daha müsbət yanaşır.
Vətəninfo.az xəbər verir ki, Tramp bu fikirləri Ağ Evdə jurnalistlərlə söhbəti zamanı səsləndirib. O, ABŞ-ın həm Moskva, həm də Kiyevlə razılaşmaya yaxın olduğunu qeyd edib.
“Düşünürdüm ki, Rusiya ilə razılaşmaya çox yaxınıq. Düşünürdüm ki, Ukrayna ilə də razılaşmaya yaxınlaşmışıq. Əslində, Prezident Zelenski istisna olmaqla, onun xalqı bu razılaşmanın konsepsiyasından çox məmnun idi”, – Tramp bildirib.
Prezident əlavə edib ki, ABŞ tərəfindən təklif olunan plan “dörd və ya beş bənddən” ibarətdir və ərazilərin bölünməsini nəzərdə tutur. Bu səbəbdən tərəflər arasında danışıqlarda çətinliklər yaranır.
Tramp həmçinin Ukraynadakı müharibəyə son qoyma prosesini öz biznes fəaliyyəti ilə müqayisə edərək vurğulayıb ki, bunu həyata keçirmək “daşınmaz əmlak sövdələşməsini bağlamaqdan min dəfə çətindir”.
ABŞ-ın sülh təşəbbüsü — son vəziyyət
UNIAN xəbər verir ki, Tramp Ukraynaya təhlükəsizlik zəmanətləri ilə bağlı dəstək verməyə hazır olduğunu bildirib. Vaşinqtonun mümkün sülhməramlı və ya təhlükəsizlik missiyasında iştirak məsələsi hələ də müzakirə olunur.
“The Economist” yazır ki, Trampın müharibəyə son qoymaq cəhdləri adətən eyni ssenari ilə davam edir: Vaşinqton Kremlin maraqlarına uyğun addımlar atır, Ukrayna və Qərb müttəfiqləri planın yumşaldılmasına çalışır, lakin sonda Rusiya kompromis təklifini qəbul etmir.
