Ukrayna rəsmiləri, Financial Times-a (FT) verdikləri məlumata görə, ABŞ administrasiyası Ukrayna Prezidenti Volodimir Zelenskidən bu il noyabrın 27-nə təsadüf edən Şükran Günündə Vaşinqtonun təqdim etdiyi sülh planını qəbul etməsini gözləyir. Vətəninfo.az xəbər verir ki, rəsmi şəxslər bildiriblər ki, bundan sonra Amerika tərəfi münaqişənin həlli üçün sülh sazişini Moskvaya təqdim etməyə hazırlaşır və bu prosesin dekabrın əvvəlinə tamamlanması nəzərdə tutulur. Lakin Ukrayna prezidentinin ofisi hesab edir ki, təklif edilən müddət çərçivəsində sülh sazişi imzalanmayacaq, çünki ABŞ-ın planında Kiyev üçün “qırmızı xət”lər hesab edilən bir neçə məqam mövcuddur.
FT-nin mənbələrinə görə, Ukrayna tərəfi əks təkliflər üzərində işləyir və bu təkliflər yaxın vaxtlarda Amerika tərəfinə təqdim olunacaq.
Noyabrın 20-də Zelenski, ABŞ-ın Quru Qoşunlarının katibi Daniel Driscoll ilə görüşüb. Axios-un məlumatına görə, Driscoll Zelenskiyə sülh planını təqdim edib və onun imzalanması üçün “aqressiv plan”ı razılaşdırıb. Zelenski isə “Ukrayna xalqı üçün vacib olan prinsipial əsasları” qeyd edərək, müharibəyə son qoymaq üçün sənədin müddəaları üzərində işləməyə razılaşıb. Ukrayna prezidenti görüşdən sonra bildirib: “Biz səs-küylü bəyanatlar verməyəcəyik və aydın, dürüst işə sadiqik: Ukrayna, ABŞ, Avropa və dünyadakı dostlarımız və tərəfdaşlarımızla.”
Daha sonra ukraynalı deputat Aleksey Qonçarenko ABŞ-ın 28 bənddən ibarət sülh planını dərc edib. Bu planda Krım, Luqansk və Donetsk kimi bölgələrin faktiki olaraq Rusiya əraziləri kimi tanınması, Kiyevin Donetsk vilayətinin işğal olunmamış hissəsindən qoşunlarını çıxarması və tərəflərin Zaporojya və Xerson vilayətlərindəki hərbi əməliyyatları dondurması təklif edilir. Həmçinin, Ukrayna öz konstitusiyasında NATO-ya üzv olmaqdan imtina etməli, silahlı qüvvələrinin sayını 600 minlə məhdudlaşdırmalı və ölkədə NATO qoşunlarının yerləşdirilməsini qadağan etməlidir.
Plana görə, Rusiyaya qarşı tətbiq olunan sanksiyalar tədricən aradan qaldırılacaq və Moskva yenidən “Böyük səkkizlik” (G8) qrupuna daxil ediləcək. ABŞ və Avropa, dondurulmuş Rusiyanın 100 milyard dollar dəyərindəki aktivləri və investisiyaları ilə Ukraynanın yenidən qurulmasına çalışacaq. Kiyev ABŞ-dan təhlükəsizlik zəmanəti alacaq, Moskva isə Avropaya və Ukraynaya təcavüz etməmək öhdəliyi götürəcək. Razılaşmanın imzalanmasından 100 gün sonra Ukraynada prezident seçkiləri keçiriləcək.
Axios-a görə, Trampın xüsusi nümayəndəsi Stiv Vitkoff, təklif olunan sülh planı üzərində işləyir və o, Rusiya prezidentinin xarici ölkələrlə investisiya və iqtisadi əməkdaşlıq üzrə xüsusi nümayəndəsi Kirill Dmitriyevlə də məsləhətləşib. Dmitriyev, sülh planında iştirakını təsdiqləyərək, planın uğur şansını yüksək qiymətləndirib və bildirib: “Biz hiss edirik ki, Rusiyanın mövqeyi həqiqətən də eşidilir.”
