ABŞ Prezidenti Donald Tramp Ukraynadakı müharibəni mümkün qədər tez və hər hansı vasitələrlə dayandırmaq niyyətindədir. Bu, onun “sülh planı”nın təfərrüatlarının niyə qeyri-müəyyən və dəyişkən qalmasını izah edir.
“Politico”nun məlumatına görə, Trampın əsas məqsədi sülh sazişinin məzmunundan asılı olmayaraq müharibəyə son qoymaqdır. Ağ Ev rəsmisinin bildirdiyinə görə, prezident tərəflərin razılığa gəlməsi və döyüşlərin dayandırılması ilə maraqlanır və “müharibəni dayandıran, tərəflərin mümkün qədər tez razılaşa bildiyi” istənilən sazişi imzalayacaq.
Trampın sülh planı Ukraynanın Donbası Rusiyaya verməsini və ölkənin NATO-ya üzv olmamasını nəzərdə tutur. Avropa səlahiyyətliləri planı dərhal Rusiya tərəfindən irəli sürülən tələblər kimi qiymətləndirərək rədd edib. Eyni zamanda, Ukrayna hakimiyyəti planla bağlı sərt açıqlamalardan çəkinərək, hökumətin plan üzərində işləməyə hazır olduğunu bildirib.
Ağ Ev rəsmisi qeyd edib ki, Tramp üçün əsas prioritet sülhdür: “Əsas məqsəd döyüşü dayandırmaq və qətli dayandırmaqdır. Prezident ilk növbədə bunu istəyir.”
