Yay aylarında Ukrayna Müdafiə Qüvvələrinin Rusiyanın neft emalı sənayesinə qarşı başladığı hücum kampaniyası artıq ciddi nəticələr verməkdədir. Bu nəticələr təkcə Kreml kabinetlərində deyil, həm də sıravi Rusiya vətəndaşları arasında hiss olunmağa başlayıb.
Müharibəni Araşdırma İnstitutu (ISW)-nun məlumatına görə, oktyabr ayının ortalarına olan statistikaya əsasən, Rusiyada sürücülərin təxminən 70%-i ya yanacağın bahalaşmasından, ya da onun ümumiyyətlə olmamasından əziyyət çəkir.
Təkcə qiymət artımı yox, həm də psixoloji narahatlıq Rusiyadakı vəziyyəti gərginləşdirir. Yanacaq qıtlığı səbəbindən sürücülər benzin və dizel ehtiyatı toplamağa başlayıblar ki, bu da tələbatı süni şəkildə artıraraq defisiti daha da dərinləşdirir.
Bəzi yanacaqdoldurma məntəqələri isə mənfəətdən məhrum olmamaq üçün benzinə əlavə maddələr qataraq onun tərkibini dəyişirlər. Nəticədə minik avtomobillərində mühərrik nasazlıqları halları kütləvi şəkildə artıb.
Yanacaq böhranı fonunda Rusiyada ümumi inflyasiya göstəriciləri də kəskin şəkildə yüksəlməkdədir. Qiymət artımı təkcə yanacaqla məhdudlaşmır – daşınma, ərzaq və sənaye məhsullarında da bahalaşma müşahidə olunur.
Müharibəni Araşdırma İnstitutu qeyd edir ki, vəziyyət o qədər ağırdır ki, hətta Rusiya dövlət mediası da böhranın ölçülərini gizlədə bilmir və müəyyən səviyyədə ictimai narazılığı işıqlandırmağa məcbur qalıb. Bu isə problemlərin artıq nəzarətdən çıxdığını göstərir.
Ukraynanın neftayırma zavodlarına endirdiyi zərbələr Rusiyanın enerji və logistik sistemində ciddi pozuntulara səbəb olub. Hazırda Rusiyada yanacaq çatışmazlığı, texniki nasazlıqlar və inflyasiya geniş miqyasda yayılıb və bu prosesin yaxın zamanda stabilləşəcəyi gözlənilmir.
