Yunanıstan və Türkiyə arasındakı Bahçeköy (Kipi) sərhəd keçid məntəqəsi, 3 dekabr tarixində Yunanıstan fermerlərinin etiraz aksiyaları səbəbindən yük maşınları və ağır texnika üçün bağlanıb.
Vətəninfo.az xəbər verir ki, gömrük rəsmilərinin Anadolu Agentliyinə verdiyi məlumata görə, şəxsi nəqliyyat vasitələrinin sərhəd keçidi isə normal şəkildə davam edir. Rəsmilər, fermerlərlə hakimiyyət orqanları arasında danışıqların davam etdiyini bildirib.
Etiraz aksiyaları çərçivəsində, fermerlər Yunanıstanın müxtəlif bölgələrində şəhərlərarası magistral yolları da bağlayıblar. Noyabrın 30-da Larissa şəhəri yaxınlığında keçirilən etiraz zamanı fermerlərlə polis arasında toqquşma baş verib.
Yunanıstanlı fermerlər, artan istehsal xərcləri, gecikmiş kompensasiyalar və kənd təsərrüfatı agentliyi OPEKEPE ilə bağlı problemlər səbəbindən etirazlarını genişləndirməyi planlaşdırırlar.
Qeyd edək ki, 2025-ci ilin iyun ayında Avropa Komissiyası Yunanıstanı 2016-cı ildən bəri davam edən genişmiqyaslı kənd təsərrüfatı subsidiyası fırıldaqçılığına görə təxminən 453,4 milyon dollar məbləğində cərimələyib. Bu cərimə, OPEKEPE-dəki ciddi nəzarət boşluqları ilə əlaqələndirilir. Agentlik, saxta otlaqlar və uydurma kənd təsərrüfatı fəaliyyətləri vasitəsilə vəsaitlərin sui-istifadə edildiyini müəyyən etdikdən sonra may ayında ləğv olunub.
