Mövcud hadisələr Moskva ilə Bakı arasında münasibətlərə heç bir töhfə vermir, əksinə, onları daha da pisləşdirir. Vətəninfo.az xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova Sputnik radiostansiyasının efirində deyib.
O, Bakıda Sputnik Azərbaycan agentliyində aparılan axtarışa, agentliyin rəhbəri və baş redaktorunun həbsinə toxunub.
“Diqqəti cəlb etmək istərdim ki, bütün bu illər ərzində KİV-in fəaliyyət göstərdiyi, platformasının daha çox Azərbaycan vətəndaşları olduğu, orada Rusiya Federasiyasının vətəndaşlarının olduğu, Azərbaycan tərəfinin həmin KİV-lə bağlı nə forma, nə də məzmun baxımından heç vaxt şikayəti olmayıb”.
Zaxarova qeyd edib ki, ola bilsin ki, bəzi materiallar kiminsə xoşuna gəlməyib, amma nə media orqanına, nə də jurnalistlərə şikayət olmayıb.
“Aydındır ki, bunlar başqa mülahizələrə əsaslanaraq həyata keçirilən tədbirlərdir. Və yenə də bu barədə dünən (iyulun 1-də) Azərbaycanın Moskvadakı səfirinə məlumat verilib”, – Zaxarova qeyd edib.
Diplomat xatırladıb ki, iyulun 1-də Azərbaycanın Moskvadakı səfiri Rəhman Mustafayev Rusiya Xarici İşlər Nazirliyinə çağırılıb.
Yekaterinburq hadisələrinə toxunan diplomat qeyd edib ki, insanlar öləndə bu, şübhəsiz ki, faciədir və bu barədə Rusiya hüquq-mühafizə orqanları dərhal məlumatlandırılıb və vəziyyəti araşdırmaq üçün addımlar və tədbirlər görməyə başlayıblar.
Zaxarova vurğulayıb ki, Rusiya ilə Azərbaycan müxtəlif sahələrdə əməkdaşlıq edir və yaxşı münasibətlərə malikdir.
“Doğrudan da, dostluq münasibətləri son dərəcə vacibdir. Onları pozmaq istəyənlər nə etdikləri barədə yaxşı düşünməlidirlər”, – Zaxarova qeyd edib.
İyunun 27-də Rusiya təhlükəsizlik qüvvələri Yekaterinburqda reydlər keçirərək, illər əvvəl baş vermiş qətllərlə bağlı bir neçə azərbaycanlını saxlayıb. Həbslər zamanı iki nəfər ölüb. Rusiya İstintaq Komitəsi onlardan birinin ürək çatışmazlığından öldüyünü bildirib. Ölənlərin cəsədləri Azərbaycana aparılıb, orada ölümlərin zorakılıq nəticəsində baş verdiyi müəyyən edilib. Azərbaycan Xarici İşlər Nazirliyi Rusiyaya şikayət edib.
