ABŞ-ın Ukrayna üzrə sabiq xüsusi elçisi, ehtiyatda olan general-leytenant Kit Kellogg Ukraynada müharibənin mümkün ssenariləri barədə kəskin açıqlama verib. Onun sözlərinə görə, Donetsk vilayətinin hər hansı bir şəkildə təhvil verilməsi strateji baxımdan fəlakətli nəticələrə gətirib çıxaracaq.
“Donetskdə torpaqları verməyi düzgün fikir hesab etmirəm. Hər hansı kompromis işğalçıları dayandırmayacaq, əksinə Ukraynanı ən vacib müdafiə xəttindən məhrum edəcək”, – Kellogg Forbes nəşrinə bildirib.
General həmçinin Avropa ölkələrinin müharibənin nəticəsinə təsir imkanlarına diqqət çəkib və onların kollektiv gücünü kifayət qədər dəyərləndirmədiklərini vurğulayıb. “Mən həqiqətən inanıram ki, avropalılar və Avropa düşündüklərindən daha güclüdür. Onlar 75 il ABŞ-ın yanlarında olacağına ümid ediblər. Və biz yanlarında olacağıq. Həmişə olacağıq”, – deyə o bildirib.
Kellogg əlavə edib ki, Avropa ölkələri birləşərək hərəkət etsə, Rusiyanın hesablamalarına təsir edə biləcək çox güclü kollektiv qüvvə yaradıla bilər.
Ukraynanın gələcək perspektivlərinə toxunan general bildirib ki, konflikt bəlkə də sülh prosesinin son mərhələsinə yaxınlaşır. “Düşünürəm ki, biz sülh prosesinin son mərhələlərinə yaxınlaşırıq. Ukrayna bu qışı keçirməlidir, sonra üstünlük sizə qayıdacaq. Putin bunu görəcək və zaman keçdikcə eyni tərzdə davam edə bilməyəcək”, – deyə Kellogg vurğulayıb.
O, həmçinin iki ordunun motivasiyasını müqayisə edib: “Putinin ordusu əsasən ona ödəniş alan insanlardan ibarətdir, Ukraynanın ordusu isə öz milləti üçün döyüşür. Buna görə də, ölkəni tərk etmiş ukraynalılar geri qayıtmalı və mübarizə aparmalıdır. Onlar Ukraynanı əvvəlkindən daha yaxşı quracaqlar”.
Kellogg Ukraynanın texnologiya və insan resursları baxımından böyük potensiala malik olduğunu qeyd edib və hal-hazırda əsas əngəlin Putinin hərəkətləri olduğunu vurğulayıb.
Əvvəllər Kellogg Ukraynanın müharibənin son mərhələsinə yaxınlaşdığını və bir neçə qalan məsələ həll edildikdən sonra sülhün mümkün olduğunu da açıqlamışdı.
